Main » 2011 » დეკემბერი » 11 » კორიფაძის ბენეფისი

---

10:12 PM კორიფაძის ბენეფისი

თბილისის "ვიტ ჯორჯიამ” მიმდინარე სეზონში ამხელა სხვაობით პირველად მოიგო. ფეხბურთი გუნდურია თამაშია და მასპინძელთა გამარჯვებაში საკუთარი წვლილი ყველამ შეიტანა, მაგრამ ზურაბ ბერიძის შეგირდები სამ ქულას, დიდწილად, გიორგი კორიფაძეს უნდა უმადლოდნენ. თბილისელთა მარჯვენა ნახევარმცველმა, როგორც იტყვიან, "თავისი თამაში” დაიჭირა და უმაღლეს ლიგაში, კარიერაში პირველი ჰეთ-თრიქი მიითვალა. "ვეტერინარები” საწყის 8 გუნდში ადგილის დამკვიდრებას ეშურებიან და ზუგდიდელებთან გამარჯვება ამ მიზნისკენ მნიშვნელოვანი ნაბიჯი იყო. "ბაიას” კარგი პერიოდი ნამდვილად არ უდგას. რიხიანად დაწყებული სეზონის შემდეგ, ბოლო სამ თამაშში (2 ჩემპიონატზე და 1 თასზე) ზუგდიდელებმა საკუთარ კარში 12 გოლი გაუშვეს – იმდენი, რამდენიც მანამდე მთელი სეზონის განმავლობაში ჰქონდათ მიღებული. აშკარაა, რომ ელგუჯა ქომეთიანს გუნდს, თამაშის გამოსასწორებლად, გარკველი ზომების მიღება სჭირდება. "ვიტ ჯორჯია” თამაშის სადავეების აღებას თავიდანვე შეეცადა. მე-8 წუთზე, ბექა ზაქრაძემ მეტოქის საჯარიმოში ორთაბრძოლა გიორგი ქვარცხავას მოუგო, რის შემდეგაც, მისი დარტყმული ბურთი კარის ბადეს გარედან მოხვდა. 21-ე წუთზე, მარცხენა ფლანგიდან ლევან აკობიას გადაცემის შემდეგ, თბილისელთა საჯარიმოში ბურთი გურამ სამუშიამ მიიღო, რომელმაც მარჯვნიდან არცთუ ძლიერად დაარტყა და გიორგი ძაძამიას პრობლემა არ შექმნია. 31-წუთზე, მასპინძლებმა ბურთი ცუდად ამოიტანეს და ირაკლი ეხვაიამ თავისივე წამოწყებული შეტევა დარტყმით დაასრულა – ძაძამიამ ბურთი ხელებში დააფიქსირა. 33-ე წუთზე, გიორგი ჯანელიძე. ზუგდიდელ ფეხბურთელთან ორთაბრძოლაში, სტუმართა საჯარიმოში წაიქცა – არბიტრმა "ვეტერინართა” კაპიტანს სიმულაციისთვის ყვითელი ბარათი აჩვენა. 36-ე წუთზე, კორიფაძემ, საჯარიმო დარტყმის შესრულებისას, მეტოქის კარის წინ ბესიკ ჩიმაკაძე მონახა, რომლის თავური მიზანს ოდნავ აცდა. 43-ე წუთზე, პარტნიორის პასის შემდეგ, "ბაიას” საჯარიმოში ჩიმაკაძემ ბურთი მკერდით გაისწორა და ზაქრაძეს გადააწოდა, რომელმაც ანგარიში გახსნა. შესვენებამდე, მეტოქეებმა ერთმანეთის კართან ვითარება თითოჯერ გაამწვავეს. აკობიას საჯარიმოს შემდეგ, "ვიტელთა” მცველის მოგერიებული ბურთი ლუკა გუგუჩიას მიუვიდა, რომელმაც ხელსაყრელი პოზიციიდან არაზუსტად დაარტყა. "ვეტერინართა” შეტევის დროს კი, გიორგი პაჭკორიამ თავით ცუდად მოიგერია ბურთი, რომელიც თავითვე ჩიმაკაძემ ზაქრაძეს გადააწოდა – ამ უკანასკნელის დარტყმული მიზანს აცდა. მე-2 ტაიმი 5 წუთის განახლებული იყო, რომ შეცვლაზე შესული აკაკი ფარჯიკია "ვიტ ჯორჯიას” საჯარიმოში ორ მეტოქეს გასცდა, მაგრამ ცუდად დაარტყა. ცოტა ხანში, აკობიას გამჭოლი გადაცემის შემდეგ, მეტოქის კართან ახლოს მდგომი ირაკლი ეხვაია ნახტომში ბურთს ვერ მიწვდა. 56-ე წუთზე, კორიფაძემ, საჯარიმოს შესრულებისას, ბურთი "ვიტელთა” კარის შორეულ ძელთან ჩაჰკიდა, იქ მყოფმა ლაშა კასრაძემ კი, მახვილი კუთხიდან სათანადოდ ვერ დაარტყა. მალევე, მასპინძელთა მორიგ შეტევას ჩიმაკაძის დარტყმა მოჰყვა და გიორგი სომხიშვილმა ბურთი კუთხურზე მოიგერია. 58-ე წუთზე, რევაზ ღანიაშვილის წამოწყებული შეტევა ჯანელიძემ გააგრძელა, რომელმაც მარცხენა ფლანგზე ზაქრაძე მონახა, ხოლო ამ უკანასკნელის პასის შემდეგ, კარის სიახლოვეს მყოფმა კორიფაძემ ანგარიშში სხვაობა ორამდე გაზარდა. კორიფაძე მიღწეულზე არ შეჩერებულა და ერთ წუთში დუბლი მიითვალა – "ვეტერინართა” კონტრშეტევისას, თბილისელთა ნახევარმცველი "ბაიას” საჯარიმოში ბურთიანად მარჯვნიდან შევიდა და დაარტყა – 3:0. სოლიდური ანგარიშის მიუხედავად, თბილისელები შეტევას განაგრძობდნენ. 62-ე წუთზე, ზაქრაძის დარტყმული ბურთი სომხიშვილმა უკუაგდო, ხოლო ჩიმაკაძემ, რომელიც დამატებას ცდილობდა, საბოლოო ჯამში, ფეხი ტყუილუბრალოდ მოიქნია. ვიდრე შეცვლიდნენ, ჩიმაკაძეს თავის გამოჩენა მაინც შეეძლო, მაგრამ სომხიშვილთან პირისპირ დარჩენილმა ბურთი კარს ზემოდან გადააცილა. 71-ე წუთზე, ღანიაშვილმა ზუგდიდელთა საჯარიმოში კორიფაძე მოძებნა, რომელმაც ცრუ მოძრაობით პაჭკორია ჩამოიცილა და ახლო კუთხეში დარტყმით ჰეთ-თრიქი გაიფორმა. 73-ე წუთზე, ზაქრაძეს გატანა კიდევ ერთხელ შეეძლო, როდესაც ზუგდიდელთა საჯარიმოში ქვარცხავას აჯობა, თუმცა, მახვილი კუთხიდან უხეიროდ დაარტყა. ძირითადი დროის დასრულებამდე 15 წუთით ადრე, ეხვაიამ კარგი სოლო-რეიდი განახორციელა და მეტოქის საჯარიმოში ხელსაყრელ პოზიციაზე აკობია დატოვა, რომელმაც ანგარიში ვერ შეამცირა. ამის შემდეგ, სახიფათო მომენტი არცერთ კართან შექმნილა. ზურაბ ბერიძე: "სრული უპირატესობა გვქონდა. გუნდმა ყველაფერი ჩადო თამაშში და დამსახურებულად გავიმარჯვეთ. "ბაია” კარგი გუნდია და მინდა წარმატება ვუსურვო”. ელგუჯა ქომეთიანი: "ალბათ, ფეხბურთელთა ნაწილი იმ გუნდებზე ფიქრობს, სადაც იანვარში უნდა წავიდნენ და ბოლო დროს წარუმატებელი თამაშის ერთ-ერთი მიზეზი ეს არის. გარდა ამისა, ჩემპიონატის დაწყებამდე შეკრება არ გაგვივლია და ეს გუნდს დაეტყო – ძალა აღარ გვყოფნის, რომ ისეთ დონეზე ვითამაშოთ, როგორც სეზონის დასაწყისში გამოვიყურებოდით”. ვიტ ჯორჯია (თბილისი) – ბაია (ზუგდიდი) 4:0 (1:0) 11 დეკემბერი. მცხეთა. "მცხეთა პარკი”. ვიტ ჯორჯია: ძაძამია, დავით ხურცილავა, გოგიაშვილი, კასრაძე, ღანიაშვილი, გურამ გურეშიძე, ჩიმაკაძე (სიხარულიძე, 72), ზაქრაძე (ჯუღელი, 82), კორიფაძე, გიორგი ჯანელიძე (კ) (გიორგი გურეშიძე, 68), ვასაძე. მთავარი მწვრთნელი: ზურაბ ბერიძე ბაია: სომხიშვილი (კ), ქვარცხავა, აფაქიძე, პაჭკორია, აკობია, გუგუჩია (ფარჯიკია, 46), ტყემელაძე, გურამ სამუშია (ჟიშკარიანი, 46), ენდელაძე (გამრეკლიძე, 67), სიხარულია, ეხვაია. მთავარი მწვრთნელი: ელგუჯა ქომეთიანი გოლები: 1: ზაქრაძე (43), 2:0 კორიფაძე (58), 3:0 კორიფაძე (59), 4:0 კორიფაძე (71). გაფრთხილება: აკობია (31), ჯანელიძე (33), გუგუჩია (35). მთავარი მსაჯი: გიორგი ვადაჭკორია (თბილისი).

1 2 3 4 5 Category: სიახლეები | Views: 842 | Added by: John_Cena | Rating: 0.0/0

Total comments: 0