"დინამოს” ზედიზედ მე-2 მარცხით, მისმა მდევრებმაც კარგად ისარგებლეს და ცხრილში მის წინ მდგომმა ჩემპიონმაც. "ზესტაფონი”, რომელიც ზედმეტი დაძაბვის გარეშე გაუსწორდა ცხინვალის "სპარტაკს”, 3 ქულით დაწინაურდა. სამაგიეროდ, II-V ადგილებზეა ისეთი სიმჭიდროვე, ეროვნულ ჩემპიონატს კარგა ხანს რომ არ ჰქონია. დიდი ალბათობაა, რომ სწორედ დღეისათვის მოწინავე 5 გუნდი გაითამაშებს საგაისო საევროტურნირო საგზურებს. იქამდე ჯერ საკმაო დროა და  სეზონის დარჩენილი სატურნირო ბრძოლა იმ ერთი ზედმეტის გამოვლენას დასჭირდება (შესაძლოა, ორის), რომელიც მაისის ბოლოს ევრო-ოფსაიდში დარჩება.

ბაია - დინამო
ტურის ცენტრალურმა მატჩმა მოლოდინი გაამართლა. ყოველ შემთხვევაში, მისმა შედეგმა ჩემპიონატს ინტრიგა შემატა. ზუგდიდში თბილისის "დინამოს” სტუმრობას ყოველთვის დიდი ინტერესით რომ ელიან, ახალი ამბავი არაა. "ბაიას” საამმატჩო მოტივაციას, სატურნიროს გარდა, ისტორიული მხარეც ჰქონდა. დღემდე დინამოელებთან გამართულ 8 შეხვედრაში, ზუგდიდელებს ერთხელაც არ მოეგოთ. ამდენად, ელგუჯა ქომეთიანის შეგირდთა წარმატება, მართლაც რომ ისტორიული გამოდგა.
თბილისური კლუბის ოფიციალური საიტის ონლაინით თუ ვიმსჯელებთ, მოგება ორივე გუნდს შეეძლო. მასპინძლები ანგარიშში ნიკა მგელაძემ დააწინაურა, რომელიც მისი გუნდის შეტევაში შედეგიანად ჩაერთო - 1:0. ვიდრე ჩისკო პირველი ტაიმის დამატებულ პირველივე წუთზე გაათანაბრებდა ანგარიშს, მანამდე, სტუმრებს არაერთი საგოლე შანსი მიეცათ, მაგრამ ვერ იხეირეს.
მეორე ტაიმში აქტიურობდა შეცვლაზე შესული ჯაბა ჯიღაური, რომლის დარტყმულებს გამოცდილი სომხიშვილი ეუფლებოდა. თავის გამოჩენა შეეძლო კახელიშვილს, კოტოს და კოშკაძეს, მაგრამ "დინამოს”, ამ დღეს, მეტი გოლის გატანა არ ეწერა. სამაგიეროდ, გაიტანა "ბაიამ” და ისეთ დროს, როცა მეტოქეს გათანაბრების დრო პრაქტიკულად აღარ ჰქონდა. ზვიად სიხარულიას ნაცვლად მინდორზე შესულმა გიორგი პაჭკორიამ, საჯარიმოს გათამაშების შემდეგ, მატჩს წერტილი დაუსვა - 2:1.

”ბაია” (ზუგდიდი) - ”დინამო” (თბილისი) 2:1 (1:1)
22 ოქტომბერი. ზუგდიდი, ”გულია თუთბერიძე”.
”ბაია”: სომხიშვილი, ტყემალაძე, გუგუჩია, სიხარულია (გიორგი პაჭკორია, 84), რიგვავა, ქობალია, ეხვაია (შოთა ლომია, 76), წურწუმია (გურამ სამუშია, 89), აფაქიძე, მგელაძე, აკობია.  
მთავარი მწვრთნელი: ელგუჯა ქომეთიანი.
”დინამო”: ლორია, ოდიკაძე, თომაშვილი, ჰომოლა, გიორგი ზურაბის ძე რეხვიაშვილი, კოშკაძე, ალვარო, კოტო (იაგუე, 83), კახელიშვილი (რობერტინიო, 77), ჩისკო, კაკუბავა (ჯიღაური, 38).
მთავარი მწვრთნელი: ალექს გარსია.
გოლები: 1:0 მგელაძე (8), 1:1 ჩისკო (45+1), 2:1 პაჭკორია (90+2).
გაფრთხილება: ჰომოლა (33), რეხვიაშვილი (40), კოშკაძე (49), კოტო (82).
მსაჯები: მ. ბეუქლიშვილი; ბ. ჭიჭინაძე, კ. ტეფნაძე; გ. დოგრაშვილი.