ტურის წინათქმაში გარკვეული "შიშიც" გვქონდა: ჩემპიონატის სტარტიდან რიგით მეცამეტე ტური გველოდება და ცრურწმენასაც არავინ აჰყვეს-თქო; ჰოდა, მოდი და ნუ დაიჯერებს კაცი, 13 რომ "თარსი" რიცხვი არ არის - გასულ ტურში ერთი-ორი კი არა, რამდენიმე მართლაც "უცნაური" ფაქტი თუ მოვლენა მოხდა; თუმცა, გასული ტური ყველასთვის როდი იყო უიღბლო თუ წარუმატებელი, - ზოგს, პირიქით, უჩვეულოდ სუსხიანი 6 ნოემბერი, ალბათ, არასდროს დაავიწყდება! ჩვენც, რაღა თქმა უნდა, ჯერ დადებითზე ვისაუბრებთ.

მაღლა და მაღლა...
ჩემპიონატში ორკვირიანი შესვენებაა გამოცხადებული და 20 ნოემბრამდე სატურნირო ცხრილის სათავეში ქუთაისის "ტორპედო" იქნება! ადვილი წარმოსადგენია, თუ რა განწყობა იქნება ქუთათურ გულშემატკივრებში - "ტორპედოს" ერთგული ქომაგები ახლა, ალბათ, იმას იხსენებენ, თუ როდის იყო მათი საყვარელი გუნდი პირველ ადგილზე;

არადა, ამ სეზონის დასაწყისში კი არა, თვენახევრის წინაც მოვლენების ასეთ განვითარებას ბევრი ვერც იფიქრებდა - საწყის შვიდ ტურში გუნდმა 10 ქულის მოგროვება მოახერხა, მომდევნო ექვს მატჩში კი ქულათა მაქსიმუმი მოაგროვა! აქვე ისიც ვთქვათ, რომ ზედიზედ ექვსმატჩიანი მორგებათა სერია ამ სეზონის რეკორდია - მანამდე საუკეთესო შედეგი (მიჯრით 5 გამარჯვება) "ზესტაფონს" ჰქონდა.

თუმცა, ისევ "ტორპედოს" დავუბრუნდეთ, უფრო ზუსტად, ქუთათურთა საყვარელი გუნდის ასეთი წარმატებული თამაშის მთავარი შემოქმედი, გია გეგუჩაძე უნდა ვახსენოთ; ფაქტია, რომ სწორედ ამ მწვრთნელის მისვლის შემდეგ დაიწყო "ტორპედოს" აღმასვლა; არადა, გეგუჩაძეს, ფაქტობრივად, სერიოზული საკადრო ცვლილებები (ერთი-ორი პოზიციის გარდა) არ განუხორციელებია, მაგრამ "ტორპედოს" ყველა ფეხბურთელი (ვეტერანიც და ახალგაზრდაც) არნახული მოტივაციითა და მონდომებით ასპარეზობს და შედეგიც სახეზეა.

აი, ბოლო ტურის მატჩიც გავიხსენოთ, როცა მეტოქის კარში გოლები 33 წლის გიორგი მეგრელაძემ და 29 წლის დავით გამეზარდაშვილმა გაიტანეს; მეგრელაძის ბომბარდირული თვისებები, ლამის ორი ათეული წლებია, აღარავის უკვირს, აი, გამეზარდაშვილმა კი "ტორპედოში" დაბრუნების შემდეგ პირველი გოლი გაიტანა. თუმცა, არც ეს ფაქტი უნდა გაგკვირვებოდა: 2006-07 წლების სეზონში "ტორპედოს" საუკეთესო ბომბარდირი ხომ სწორედ ეს ფეხბურთელი გახლდათ; თანაც, იმასაც შეგახსენებთ, რომ ამპლუით მცველმა გამეზარდაშვილმა იმ სეზონის მხოლოდ ნახევარი ჩაატარა და მერე მიაშურა უცხოეთს. და აი, ხუთწლიანი პაუზის მერე პირველი გოლიც საქართველოს ჩემპიონატში!

ბაია - მეტალურგი
ზედიზედ მე-3 მარცხი იწვნია "ბაიამ”, მისმა მეტოქემ კი, აუტსაიდერებთან ორმატჩიანი ჩავარდნის შემდეგ, პირველად მოიგო. "მეტალურგს”, ეროვნულ ჩემპიონატზე მოასპარეზე ფორვარდთაგან მართლაც ნაყოფიერი დუეტი ჰყავს. ტატანაშვილი და მოდებაძე, ხან ერთად, ხან ცალ-ცალკე უტევენ მეტოქის კარს და შედეგიც სახეზეა. რუსთაველმა თავდამსხმელებმა წყვილში 13 გოლი გაიტანეს.
სწორედ ირაკლი მოდებაძის სწრაფმა გოლებმა გადაწყვიტეს ზუგდიდური დაპირისპირების ბედი. "მორემ” მე-11 წუთზე გახსნა ანგარიში, ხოლო სამიოდე წუთში მისი გუნდი ორბურთიანი სხვაობით დააწინაურა. "ბაიას” ახალგაზრდულმა გუნდმა, მეორე ტაიმის დასაწყისში ერთი გოლის გატანაღა შეძლო. თავი, სეზონში უკვე მეორედ, ნიკა მგელაძემ გამოიჩინა.

ჯანელიძე-შოუ!
გასული ტურის ცენტრალური მატჩი მცხეთაში ჩატარდა და ამ შეხვედრას ვინც დაესწრო, ნამდვილად არ უნანია: ახალგაზრდულ "ვიტ ჯორჯიამ" ტოლი არაფერში დაუდო წყვილში ფავორიტად მიჩნეული "დინამოს" და საბოლოოდ, ეს მართლაც უშეღავათო დაპირისპირება უხვგოლიანი ფრით დამთავრდა. მასპინძლებმა უაღრესად მონდომებული და მოტივირებული თამაში დაუპირისპირეს ბევრად უფრო გამოცდილი ფეხბურთელებით დაკომპლექტებულ მეტოქეს და შესაშური ფიზიკური გამძლეობის გარდა, ზურაბ ბერიძის ახალგაზრდა შეგირდებს, ფსიქოლოგიური მომზადებაც უნდა მოვუწონოთ.

ბოლოს და ბოლოს, მართლაც არ არის პატარა ამბავი, პრინციპულ მეტოქესთან მატჩში ორჯერ რომ შეძლებ ანგარიშის გათანაბრებას და საერთოდაც, შეხვედრის გადარჩენას. მოკლედ, კვირას ახალგაზრდა "ვეტერინარებმა" ისეთი ქულა მოიპოვეს, ერთდროულად რამდენიმე გამარჯვებას რომ "გადასწონიდა" და, როგორც უკვე აღვნიშნეთ, მთელი გუნდი შექებას იმსახურებს.

თუმცა, ერთი ფეხბურთელი მაინც ცალკე გვინდა აღვნიშნოთ: ნამდვილად არ არის დიდი ხანი, 22 წლის გიორგი ჯანელიძე "ვიტ ჯორჯიას" კაპიტნად რომ აირჩიეს; ამ ახალგაზრდა პლეიმეიკერმა კი ეს დიდი ნდობა ჩინებული თამაშით გაამართლა! თანაც, როგორ გგონიათ, ჯანელიძემ მხოლოდ "დინამოსთან" მატჩში ითამაშა შთამბეჭდავად - ასეა, სეზონის დასაწყისიდან მოყოლებული, უბრალოდ, კვირას "მცხეთა-პარკზე" გულშემატკივართა რაოდენობაც გაზრდილი იყო და მათგან უმრავლესობამაც, ალბათ, პირველად ნახა უაღრესად ტექნიკური შემტევის სწრაფი და გონივრული გადაწყვეტილებები.

კიდევ ვიმეორებთ: ჯანელიძემ ამ სეზონში უკვე მერამდენე შთამბეჭდავი მატჩი ჩაატარა და იგივე გვინდა ვთქვათ, საერთოდ, "ვეტერინართა" უაღრესად მობილურ შუახაზელებზე, მეტოქეს თავისუფალ სივრცეებს რომ უზღუდავდნენ და პირველი შესაძლებლობებიდანვე, სწრაფ და გააზრებულ იერიშებს რომ იწყებდნენ.

თემა განსჯისათვის
თასის მერვედფინალში გამოვარდნას კიდევ ერთი მოუგებელი მატჩი მოჰყვა - ვერაფერს ვიტყვით, "დინამოს" მართლაც კოშმარული კვირა ჰქონდა. გასაგებია, ყველა მატჩს ვერ მოიგებ, მით უფრო, როცა გუნდში გარკვეული საკადრო პრობლემებია (ტრავმირებული არიან ცენტრალური მცველები - ლევან კაკუბავა და გულვერდ თომაშვილი, ლევან ხმალაძის გამოჯანმრთელებასაც საშველი არ დაადგა), მაგრამ ჩვენს ყველაზე ტიტულიან და ამბიციურ კლუბში "რაღაც" რომ ხდება, შეუიარაღებული თვალითაც კარგად სჩანს.

ეგ კი არა, გუნდის მთავარ მწვრთნელამდეც, ბოლოს და ბოლოს, ეტყობა მიუღწევია იმ "მოარულ" ხმებს, რომლის მიხედვითაც ესპანელ სპეციალისტს "ნდობის მანდატი" თურმე, დეკემბრამდე ჰქონია. სწორედ ამიტომ განაცხადა კიდეც ალექს გარსიამ "ვიტ ჯორჯია"-"დინამოს" მატჩის შემდგომ ჩატარებულ პრესკონფერენციაზე, რომ თავისი გუნდის გარშემო მშვიდი გარემო ნამდვილად არ არის და ფეხბურთელებისათვისაც ყოველი მატჩი ფინალის ტოლფასიაო.

წარმატებული მეგოლეები
ბომბარდირთა დავაში კვლავაც "სამხელისუფლებიანობაა": 26 წლის ჯაბა დვალს ("ზესტაფონი"), 28 წლის დიმიტრი ტატანაშვილსა და 31 წლის ჩისკოს ("დინამო") 8-8 გოლი აქვთ გატანილი; ისე, ალბათ, უბრალო დამთხვევაა, მაგრამ ფაქტია: მეცამეტე ტურში 13 გოლი გავიდა! აქედან, მხოლოდ ერთი შემთხვევა იყო, როცა კონკრეტულმა ფეხბურთელმა "დუბლი" შეასრულა: ტრავმამოშუშებული 27 წლის ირაკლი მოდებაძის წყვილი გოლით "მეტალურგმა" მნიშვნელოვანი 3 ქულა მოიპოვა.

სხვათა შორის, მოდებაძე ზედიზედ მეოთხე მატჩია (თასის შეხვედრის ჩათვლით) მოედანს უგოლოდ არ ტოვებს; ასევე მშვენიერი სერიებით შეუძლიათ იამაყონ "ვიტ ჯორჯიას" 21 წლის მარცხენა გარემარბს ბექა ზაქრაძესა და მის თანატოლს, "მერანის" ნახევარმცველს ელგუჯა გრიგალაშვილს, ზედიზედ მეორე ტურია თავიანთი გუნდებისათვის უმნიშვნელოვანესი გოლები რომ გააქვთ.

ამ სეზონის გუნდი-აღმოჩენის, "მერანის" კიდევ ერთი ფეხბურთელიც გვინდა აღვნიშნოთ: მარტვილელთა 23 წლის მარცხენა მცველმა ანზორ სუხიაშვილმა უმაღლეს ლიგაში სადებიუტო გოლი გაიტანა!

სამწვრთნელო რებუს(ებ)ი
ეს უკვე მართლაც მეტისმეტია: ტური არ გავა, რომელიმე გუნდში მომხდარი სამწვრთნელო ცვლილების შესახებ რომ არ შევიტყოთ; ალბათ, გახსოვთ, თუ როგორი უცნაური სიტუაცია შეიქმნა ამ ცოტა ხნის წინ ბოლნისის "სიონში": გუნდში ახლადდანიშნულმა მთავარმა მწვრთნელმა ხვიჩა ქასრაშვილმა პოსტი ისე დატოვა, არც ერთი ოფიციალური მატჩი არ ჩაუტარებია! ანუ, ქასრაშვილი დაახლოებით 10 დღის განმავლობაში ავარჯიშებდა ქვემოქართლელებს, ერთ საკონტროლო მატჩშიც გაუძღვა გუნდს, მაგრამ მერე, საკუთარი სურვილით წამოვიდა.

აი, ფოთში კი მართლაც უცნაურზე-უცნაური რამ მოხდა: ახალგაზრდა სპეციალისტი გელა სანაია "კოლხეთის" მთავარი მწვრთნელი ერთი დღის განმავლობაში იყო და მერე, როცა ახალი გუნდი მოედანზე პირველად უნდა გამოეყვანა, სწორედ იმ დღეს უთხრეს, აღარ გვჭირდებიო.

P.S. აბა, ისე როგორ იქნებოდა, XIII ტურს "კუდი არ მოექნია": უამინდობის გამო "კოლხეთი"-"ზესტაფონის" მატჩი გადაიდო! ისე, ჩვენი მოედნებისა და ნაადრევად მოსული ზამთრის "გადამკიდე", დიდი შანსია, არასრული ტური მომავალშიც ხშირად გვქონდეს.

უმაღლესი ლიგის XIII ტურის სიმბოლური ნაკრები
მიგინეიშვილი (2, ტორპედო), ადამაძე (2, ვიტ ჯორჯია), გამეზარდაშვილი (4, ტორპედო), სუხიაშვილი (4, მერანი), კორიფაძე (2, ვიტ ჯორჯია), ე.გრიგალაშვილი (4, მერანი), ჯანელიძე (3, ვიტ ჯორჯია), ზაქრაძე (2, ვიტ ჯორჯია), ჩიმაკაძე (ვიტ ჯორჯია), მეგრელაძე (ტორპედო), მოდებაძე (3, მეტალურგი).
მწვრთნელი: ზურაბ ბერიძე (2, ვიტ ჯორჯია)