ვის დათარსავს მე-13? - 5 ნოემბერში 2011

Main » 2011 » ნოემბერი » 5 » ვის დათარსავს მე-13?

10:54 PM

ვის დათარსავს მე-13?

06.11, 14:00. მცხეთა, "მცხეთა პარკი”. "ვიტ ჯორჯია” (თბილისი) - "დინამო” (თბილისი) (პირველი წრე 0:2)
მსაჯები: თ. გვანცელაძე; გ. ყრუაშვილი, ზ. ჯვარიძე; ა. ნონიკაშვილი.
იშვიათია ეროვნულ ჩემპიონატში გუნდი, რომლისთვისაც მიმდინარე სეზონის დაწყების შემდეგ მთავარი მწვრთნელი არ შეეცვალოთ (12-დან 8-ში უკვე ცვლილება მოხდა). მით უფრო იშვიათია მატჩი, რომელშიც 2 "ხელუხლებელი” გუნდი უპირისპირდება ერთმანეთს. თბილისური დერბიც ამ იშვიათ გამონაკლისს მიეკუთვნება. "ვიტ ჯორჯიას” და "დინამოს” თავკაცები, როგორც ჩანს, კლუბის მეპატრონეთა იმედებს ამართლებენ და იმიტომაც სარგებლობენ ასეთი ნდობით.
"ვეტერინარებს” თაობათა ცვლა აქვთ, რამაც ბოლო წლებში საპრიზო სამეულში და შესაბამისად, ევროტურნირზე მოხვედრისთვის მებრძოლ გუნდს გეგმებიც შეუცვალა. ზურაბ ბერიძის გაწვრთნილები საუკეთესო 8 გუნდში მოხვედრისთვის იბრძვიან და თუ რამე გაუთვალისწინებელი არ მოხდა, ალბათ მიზანს მიაღწევენ.
უმაღლეს ლიგაში მოთამაშეთა შორის, ურთიერთშეხვედრებში ნაჩვენები შედეგებით, "ვიტ ჯორჯია” ”დინამოსთვის” ერთ-ერთი ყველაზე უხერხული მეტოქე კია, მაგრამ გასულ სეზონში ”ვეტერინარებმა” ვერცერთი მატჩის მოგება (1 ფრე, 3 წაგება) ვერ შეძლეს. ეს გუნდები დღემდე ერთმანეთს 45-ჯერ შეხვდნენ და მოგებათა ბალანსი დინამოელთა სასარგებლოდაა - 17:11 (ბურთების უკეთესი ბალანსიც 51:36 ”დინამოს” მხარესაა).

06.11, 14:00. საგურამოს საწვრთნელი ბაზის ხელოვნურსაფარიანი მოედანი. "სპარტაკი” (ცხინვალი) - "მერანი” (მარტვილი) (0:2)
მსაჯები: ა. კრიჭაშვილი; მ. ელიკაშვილი, კ. ტეფნაძე; დ. ხარიტონაშვილი.
ამ გუნდებს 3-დღიანი შუალედით ზედიზედ უწევთ დაპირისპირება. გასულ ოთხშაბათს მარტვილელები ერთხელ უკვე ეწვივნენ ცხინვალელთა საშინაო არენად შერჩეულ საგურამოს საწვრთნელ ბაზას. ეროვნულ თასზე შინ მოგებული (2:0) მატჩის შემდეგ, "მერანმა” სტუმრად 1:1 ითამაშა და 1/4-ფინალში თამაში გაინაღდა.
ჩემპიონატს რაც შეეხება, ამ ფრონტზე მალხაზ ჟვანიას გუნდს გაცილებით უკეთ აქვს საქმე, ვიდრე "სპარტაკს”. ბოლო ხუთ მატჩში მოპოვებული 4 სამქულიანი, მარტვილელებს მშვიდად ყოფნის საშუალებას აძლევს. შიდაქართლელები კი, კრიზისიდან თავის დაღწევას ცდილობენ, რისთვისაც რაც შეიძლება მეტი ქულა ესაჭიროებათ.

06.11, 14:00. ზუგდიდი, "გულია თუთბერიძე”. "ბაია” (ზუგდიდი) - "მეტალურგი” (რუსთავი) (0:2)
დისკვალიფიცირებული: ზვიად სიხარულია (ბაია).
მსაჯები: ლ. სილაგავა; ზ. მენთეშაშვილი, ლ. თოდრია; ი. ურუშაძე.
შუა კვირაში, სათასო ბარიერის წარმატებულად დაძლევის შემდეგ, ეს გუნდები დროებით ისევ ჩემპიონატზე გადაერთვებიან, სადაც დაკარგული პოზიციების დაბრუნებას შეეცდებიან. სულ ცოტა ხნის წინ, ”ბაიაც” და ”მეტალურგიც” მოწინავე სამეულში იმყოფებოდნენ, თან ისე, რომ ერთპირივნულ ლიდერს მინიმალური სხვაობით ჩამორჩებოდნენ. ზედიზედ ორ მატჩში წარუმატებელმა გარჯამ ზუგდიდელები მე-6, რუსთაველები კი მე-4 ადგილამდე ჩამოაქვეითა.
მეტოქეებმა ერთმანეთში 9-ჯერ ითამაშეს. 7-ჯერ რუსთაველებმა იმარჯვეს, "ბაიას” აქტივში კი გასული სეზონის მიწურულს ”ფოლადზე” მოგებული (3:1) თამაშია (ბურთების სხვაობა 14:5 რუსთაველთა სასარგებლოდ).

06.11, 14:00. ლანჩხუთი, "ევგრაფი შევარდნაძე”. "კოლხეთი” (ფოთი) - "ზესტაფონი” (1:1)
დისკვალიფიცირებული: ედიკ საჯაია (ზესტაფონი).
მსაჯები: მ. ბეუქლიშვილი; ზ. ფიფია, ბ. ჭიჭინაძე; გ. დოგრაშვილი.
ცნობილი ამბავია, რომ ფოთელებს ქვეყნის ჩემპიონთან და გათამაშების ერთპიროვნულ ლიდერთან ”საშინაო” დუელში გელა სანაია უთავკაცებს. 33 წლის სპეციალისტისთვის ეს მესამე საუმაღლესლიგო დებიუტია. თუ წინა ორს გავიხსენებთ, მათში სანაიას გაწვრთნილმა გუნდებმა ფრედ ითამაშეს: თბილისის ”ლოკომოტივმა” - ”ზესტაფონთან” (0:0), ”სამტრედიამ” - ცხინვალის ”სპარტაკთან” (2:2).
”რკინიგზელთა” თავკაცად მუშაობისას, გელა სანაია ”ზესტაფონის” მეხამრიდად იყო ცნობილი. 2009-2010წწ სეზონში, მისი გაწვრთნილი ”ლოკომოტივი” ჩემპიონობისთვის მებრძოლ იმერულ გუნდს 4-დან სამ მატჩში ფრედ ეთამაშა და მხოლოდ ერთხელ წააგო (0:1).
ისტორიას ”კოლხეთსა” და ”ზესტაფონს” შორის გამართული 5 დაპირისპირება ახსოვს. ფოთელთა აქტივში მხოლოდ ზესტაფონში ორჯერ ფრედ (0:0, 1:1) ნათამაშები მატჩია. დანარჩენებში კი, იმერლებმა ბურთების შთამბეჭდავი სხვაობით იმარჯვეს - 8:1.

06.11, 14:00. თბილისი, "მერანი”. "გაგრა” - "სიონი” (ბოლნისი) (3:1)
დისკვალიფიცირებულები: მიკოლა ნაკონეჩნი (გაგრა); ლევან ჩხეტიანი (სიონი).
მსაჯები: ჯ. ხორავა; გ. ჩიგოგიძე, ლ. ვარამიშვილი; ლ. კვარაცხელია.
ბოლნისელებმა წინა ტურში ისტორიული გამარჯვება იზეიმეს. "სიონმა” მიმდინარე სეზონში პირველი ოფიციალური მოგება მოიპოვა და ეს ძლეული გუნდი საკმაოდ ამბიციური ზუგდიდის "ბაია” იყო. რაც შეეხება "გაგრას”, ამ გუნდმა სეზონის წარმატებული სტარტის შემდეგ, საგრძნობლად დათმო პოზიციები და თუ დროზე არ მიხედა ქულების მარაგს, ქვედა ოთხეულის კუთვნილ ადგილს არავინ შეეცილება.
დღემდე ამ გუნდებს შორის გამართულ 8 საჩემპიონატო მატჩში ”სიონმა” 4 მოიგო, გაგრელთა აქტივში კი, პირველ წრეში სტუმრად მოპოვებული დამაჯერებელი გამარჯვებაა. გატანილ-გაშვებული ბურთების ბალანსიც ბოლნისელთა მხარესაა - 12:8.

06.11, 18:00. ქუთაისი, "ცენტრალური”. "ტორპედო” (ქუთაისი) - "დილა” (გორი) (1:0)
დისკვალიფიცირებულები: გიორგი დათუნაიშვილი (ტორპედო); გივი ქარქუზაშვილი (დილა).
მსაჯები: გ. ვადაჭკორია; ს. სპიცინი, დ. ჩიგოგიძე; ო. ხეცაძე.
კვირას, ქუთაისს განვლილი ოთხშაბათის სათასო ბატალიების სენსაციის ავტორი გორის "დილა” ეწვევა. შიდაქართლელებმა გათამაშებას მისი მუდმივი ფავორიტი თბილისის "დინამო” გამოთიშეს, ახლა კი, ჩემპიონატის ბოლო ტურების აღმოჩენის, ქუთაისის "ტორპედოსთვის” პირველ წრეში ნაწვნევი მარცხისთვის რევანშის აღებას შეეცდება.
გეგუჩაძის მთავარ მწვრთნელად მოსვლის შემდეგ, ქუთათურებს ქულა არ დაუკარგავთ და ზედიზედ 6 მატჩის მოგებით, ერთპიროვნულ ლიდერ "ზესტაფონს” ქულითღა ჩამორჩებიან. გორელებს რაც შეეხება, მიყოლებით 4 შეხვედრის წაგების შემდეგ, რამაზ სოღოლაშვილის გაწვრთნილმა გუნდმა პირველი ქულა გასულ ტურში ("ვიტ ჯორჯიასთან” 1:1) მოიპოვა.
სულ მეტოქეებმა ერთმანეთში 38 საჩემპიონატო შეხვედრა გამართეს, რომელთაგან ქუთათურებმა 24-ში იმარჯვეს, გორელებმა - 10-ში. ბურთების ბალანსიც ”ტორპედოს” სასარგებლოდაა - 83:39.
ამ მატჩის პირდაპირი ტელერეპორტაჟი საზოგადოებრივი მაუწყებლის ”პირველ არხზე” გადაიცემა.

1.	ზესტაფონი	12	8	2	2	25:14	26
2.	დინამო	12	8	1	3	25:12	25
3.	ტორპედო	12	8	1	3	15:7	25
4.	მეტალურგი	12	6	3	3	17:13	21
5.	მერანი	12	6	2	4	14:12	20
6.	ბაია	12	6	1	5	15:10	19
7.	ვიტ ჯორჯია	12	4	3	5	11:15	15
8.	გაგრა	12	4	1	7	12:17	13
9.	კოლხეთი	12	3	3	6	11:18	12
10.	დილა	12	3	2	7	16:19	11
11.	სპარტაკი	12	2	4	6	8:18	10
12.	სიონი	12	1	3	8	8:22	6

შენიშვნები
• 2 წრის შემდეგ, I-VIII ადგილზე გასული გუნდები, ურთიერთშეხვედრებში დაგროვილი ქულებით და გატანილ-გაშვებული ბურთებით, ორ წრედ იბრძოლებენ ჩემპიონის ტიტულისა და უეფას ევროპის ლიგის საგზურებისთვის. ბოლო 4 გუნდი კი, პირველი ლიგის ზონებში დაწინაურებულ ორ-ორ გუნდთან ერთად (8 გუნდი ორ წრედ ნულიდან), გაითამაშებენ უმაღლესი ლიგის ოთხ საგზურს.

ბომბარდირები
8 - ჩისკო (დინამო), ჯაბა დვალი (ზესტაფონი) (1 პენ.), დიმიტრი ტატანაშვილი (მეტალურგი) (1 პენ.);
5 - რატი წინამძღვრიშვილი (ზესტაფონი) (1 პენ.);
4 - ალვარო (დინამო), გიორგი მანწკავა (მერანი), ნიკოლოზ გელაშვილი (ზესტაფონი) (1 პენ.);
3 - რომან ახალკაცი (დილა), ელგუჯა გრიგალაშვილი (მერანი), შოთა გრიგალაშვილი (ზესტაფონი), რევაზ გოცირიძე (ტორპედო), ლუკა გუგუჩია (ბაია), გიორგი დათუნაიშვილი (ტორპედო), გრიგოლ დოლიძე (ტორპედო), შალვა კვანტალიანი (გაგრა), ალექსანდრე კოშკაძე (დინამო), ზვიად მეტრეველი (სპარტაკი), ირაკლი მოდებაძე (მეტალურგი), დავით რაჟამაშვილი (დილა), ირაკლი ქობალია (ბაია), ლევან შარიქაძე (გაგრა), დათა ციცხვაია (კოლხეთი), კოტო (დინამო) (1 პენ.).

Category: სიახლეები | Views: 876 | Added by: John_Cena | Rating: 0.0/0

Total comments: 0