ეროვნული საფეხბურთო ჩემპიონატის XIV ტურში თბილისის "დინამოსთან” განცდილი მარცხით (0:2), ქუთაისის "ტორპედოს” უდანაკარგო 6-მატჩიანი სერია შეუწყდა. იმერელთაგან ესტაფეტა "მერანმა” გადაიბარა, რომელსაც შედარებით მოკრძალებული სერიის (ზედიზედ მოგებული 4 მატჩი) დაცვა, მომავალ ტურში სწორედ ქუთათურთაგან მოუწევთ. ტურის სენსაციამდე წამები დააკლდა "გაგრას”, რომელიც რუსთავში გათამაშების ერთ-ერთ ფავორიტს ამარცხებდა.

დინამო - ტორპედო
ქართული "კლასიკოს” ლაკონური და სამართლიანი შეფასება, მისმა ერთ-ერთმა მონაწილე გია გეგუჩაძემ გააკეთა. ქუთათურთა თავკაცის თქმით, მინდორზე მხოლოდ ერთი გუნდი იყო, სახელად "დინამო”.
ვინმეს თავი რომ შეეწუხებინა და გუნდების მიერ ბურთის ფლობის ხანგრძლივობა დაეანგარიშებინა, თბილისელთა აშკარა უპირატესობას (დაახლოებით 80-20-ზე) დააფიქსირებდა. მეტოქეს თუ ბურთი ვერ წაართვი და შესაბამისად, ვერც აკონტროლე, შედეგს ვერ მიაღწევ. დარწმუნებული ვართ, რიონისპირელებმა ამასთან ერთად ისიც იციან, როგორ უნდა დააღწიონ თავი ამ ჩავარდნას. მით უფრო, კარზე პრინციპულ მეტოქესთან სათასო დაპირისპირება (24 ნოემბერს "ზესტაფონთან”) აქვთ მომდგარი.
მატჩის პირველი ნახევარი საათი მეტნაკლებად თანაბარ ბრძოლაში წარიმართა. მეტიც, მე-15 წუთამდე უპირატესობა სტუმართა მხარეს იყო. გიორგი დათუნაიშვილმა სეხნია მეგრელაძის მიერ მკერდით ჩამოგდებულ ბურთს ძლიერად კი დაჰკრა, მაგრამ დარტყმას სიზუსტე დააკლდა. ცოტა ხანში გრიგოლ დოლიძე დაემუქრა "დინამოს” კარს და გიორგი ლორიას ბურთი კუთხურზე გაექცა. ამას მოჰყვა ქუთათურთა მიერ შეხვედრაში შექმნილი ყველაზე სახიფათო მომენტი, რომელიც კარში ბურთის მოხვედრებით ვერ დასრულდა. დოლიძის მიერ გაკეთებული გასწვრივი გადაცემა, კარის ხაზიდან 7-8 მეტრით დაშორებულ დათუნაიშვილს მიუვიდა, რომელმაც რა ძალითაც დაჰკრა ბურთს, ისეთი სიზუსტე რომ დაეყოლებინა მისთვის, ანგარიში გაიხსნებოდა.
ეს მოხდა მე-13 წუთზე. მას შემდეგ სტუმრებს "დინამოს” კარში რაა, მის მიმართულებით არ დაურტყამთ. უპირატესობა ნელ-ნელა თბილისელთა მხარეს გადავიდა, რაშიც ლომის წილი ალვარომ დაიდო. ესპანელი შემტევი ნახევარმცველი მასპინძლების თითქმის ყველა შეტევის წამომწყები იყო. ერთხელ ალვარომ "ტორპედოს” კარის ჯვარედინს მოარტყა ბურთი, ორჯერ მიგინეიშვილმა მოუგერია შორი მანძილიდან დარტყმული. მატჩის მეორე ტაიმის დაწყებიდან ათიოდე წუთში კი, ალვაროსგან ძელს მოხვედრებულ და უკან გამოვარდნილ ბურთს, თომაშვილმა თავით მიუჩინა ადგილი ტორპედოელა კარის ბადეში და 2:0 გახდა.
ანგარიში კი ჩისკომ პირველი ტაიმის ბოლო წამებზე გახსნა. მარცხენა მცველად მოთამაშე ტორპედოელი გიორგი გურული, ბურთის მიღებისას შეცდა, იქვე მყოფმა გიორგი კახელიშვილი ბურთიანად მეტოქის საჯარიმოში შევიდა და უმეთვალყურეოდ დარჩენილ ესპანელ გოლეადორს დაბალი უპასა - 1:0.
ქუთაისელთა ერთადერთი ნათელი წერტილი კიპერი მიგინეიშვილი იყო, რომელმაც ჩვენი დათვლილი 8 "სეივი” "მოინადირა”. 53-ე წუთზე ჩისკოს მიერ მარჯვნიდან ჩაწოდებული კუთხურის შემდეგ ვერც იგი შველოდა "ტორპედოს” კარის ჩარჩოს უსაფრთხოებას - ბურთი შორეულ ძელს მოხვდა და დაბნეულობაში მყოფი სტუმარი მცველების ნადავლი გახდა.
ბევრი რომ აღარ გავაგრძელოთ, სტუმრები დიდი სხვაობით მარცხისაგან კიპერმა იხსნა. დანარჩენ რგოლებში "ტორპედოს” თამაშს რაც შეეხება, აშკარა იყო ნახევარდაცვაში, შექმნაზე ორიენტირებული მოთამაშის არყოლა - წინ ეულად მყოფ მეგრელაძემდე ბურთი არ მიდიოდა. ბუნებრივია, ამ ყველაფერში საკუთარი წვლილი "დინამოს” გაცილებით მობილურ შუახაზს შეჰქონდა, რომლის "მეხამრიდად” გეგუჩაძეს ამ დღეს ვერავინ გამოადგა.
მატჩის შემდგომ პრესკონფერენციაზე ალექს გარსიამ აღნიშნა, რომ ამ მოგებით გუნდმა ზაფხულში ნათამაშები ევროტურნირის მატჩებისას გუნდში არსებული განწყობა დაიბრუნა. ესპანელისთვის შედეგთან ერთად ისიც მნიშვნელოვანი ყოფილა, რომ მეტოქის უდანაკარგო სერია სწორედ მისმა გუნდმა შეწყვიტა. გარსიამ ალექსანდრე კოშკაძის სამატჩო განაცხადში არყოფნაზეც გვიპასუხა - მას წელის ტრავმა აქვს და იმიტომ დავასვენეთო.
”დინამო” (თბილისი) - ”ტორპედო” (ქუთაისი) 2:0 (1:0)
20 ნოემბერი. თბილისი, "ბორის პაიჭაძე”.
”დინამო”: ლორია, გიორგი ზაურის ძე რეხვიაშვილი, ჰომოლა, ოდიკაძე, თომაშვილი, კვეკვესკირი, ალვარო, ჯიღაური (თექთურმანიძე, 87), ჩისკო (იაგუე, 82), კოტო, კახელიშვილი (ლექვთაძე, 90+1).
მთავარი მწვრთნელი: ალექს გარსია.
”ტორპედო”: მიგინეიშვილი, სევასტი თოდუა, გამეზარდაშვილი, დაჩი ფოფხაძე, გურული, გიორგი დათუნაიშვილი, ჩიკვილაძე (კუხიანიძე, 54), დოლიზე (საბანაძე, 68), დავით ბოლქვაძე, იოსელიანი, მეგრელაძე (დავით ჯანელიძე, 81).
მთავარი მწვრთნელი: გია გეგუჩაძე.
გოლები: 1:0 ჩისკო (45), 2:0 თომაშვილი (56),
მსაჯები: ლ. სილაგავა; ბ. ჭიჭინაძე, ი. უკლება; ლ. კვარაცხელია.


კოლხეთი - ბაია
რეგიონული დერბისთვის, ზუგდიდელებმა პრაქტიკულად საბრძოლო შემადგენლობა გამოიყვანეს სათამაშოდ, მაგრამ ვერ მათი მონდომება იყო საკმარისი საიმისოდ, რომ "ბაიას” გოლი გაეტანა. ცდა, არც ლანჩხუთში მასპინძლის რანგში მოთამაშე "კოლხეთს” დაუკლია, მაგრამ მატჩის არბიტრს საგოლე სასტვენის შესრულებამ არ მოუწია.
”კოლხეთი” (ფოთი) - ”ბაია” (ზუგდიდი) 0:0
20 ნოემბერი. ლანჩხუთი, ”ევგრაფი შევარდნაძე”.
”კოლხეთი”: ბობღიაშვილი, გიორგი კილასონია, ინწკირველი, ლომაშვილი, მეგრელიშვილი, შავგულიძე (პავლე დათუნაიშვილი, 61), გოგონაია, ცხადაია (ქებაძე, 75), გვალია, მდივნიშვილი (წიქარიშვილი, 85), ციცხვაია.
მთავარი მწვრთნელი: დავით მახარაძე.
”ბაია”: სომხიშვილი, ტყემალაძე, გიორგი ქვარცხავა, ნიკა შონია, გუგუჩია (ენდელაძე, 89), სიხარულია (კუკავა, 85), რიგვავა, წურწუმია (გურამ სამუშია, 80), ეხვაია, მგელაძე, აკობია.
მთავარი მწვრთნელი: ელგუჯა ქომეთიანი.
გაფრთხილებები: გოგონაია (25), გუგუჩია (25), ინწკირველი (86).
მსაჯები: გ. დოგრაშვილი; კ. გაბრიაძე, ი. კაკაბაძე; ა. კრიჭაშვილი.

მეტალურგი - გაგრა
ძალიან ახლოს იყვნენ სტუმრები რუსთავიდან 3 ქულის წაღებასთან. საამისო საფუძველი ”გაგრას” ნიგერიელმა ლეგიონერმა ჯერემიამ, ჯერ კიდევ მე-6 წუთზე ჩაყარა. აფრიკელმა, რომელიც თანდათან ეგუება საკუთარი გუნდის ძირითად შემადგენლობას, მისი პირველი ”ქართული” გოლი გაიტანა, რომელიც 93-ე წუთამდე გამარჯვების მომტანად ითვლებოდა. თუმცა, ”მეტალურგს” უკვე მერამდენედ მოევლინა მშველელად დიმიტრი ტატანაშვილი. მასპინძელთა ფორვარდმა შანსი ზედ მატჩის ბოლო წამებზე გამოიყენა და ქვემოქართლელები მსრცხისაგან იხსნა - 1:1.
”მეტალურგი” (რუსთავი) - ”გაგრა” 1:1 (0:1)
20 ნოემბერი. რუსთავი, ”ფოლადი”.
”მეტალურგი”: ბედიაშვილი, კვახაძე, რაზმაძე, ირაკლი მოდებაძე, ირაკლი მაისურაძე, ჯაფარიძე, გიორგი მიქაბერიძე (პავლიაშვილი, 78), გივი კვარაცხელია, მახვილაძე, ტატანაშვილი, ჭედია (ქავთარაძე, 27).
მთავარი მწვრთნელი: კობა ჟორჟიკაშვილი.
”გაგრა”: სეფიაშვილი, ჯგერენაია, ტყეშელაშვილი, ხუციძე, ნაკონეჩნი, ჯიშკარიანი, შარიქაძე (გაბედავა, 90+2), კალანდაძე, ჯერემია, ზვიად ჩხეტიანი, ყურულაშვილი (სიჭინავა, 86).
მთავარი მწვრთნელი: ზვიად ჯელაძე.
გოლები: 0:1 ჯერემია (6), 1:1 ტატანაშვილი (90+3).
გაფრთხილებები: კალანდაძე (67), კვარაცხელია (70), ჩხეტიანი (90+2).
მსაჯები: გ. ვადაჭკორია; ლ. თოდრია, კ. ტეფნაძე; მ. ბეუქლიშვილი.


სიონი - სპარტაკი
მატჩი რომ ორივე გუნდისთვის პრინციპული და გარდამტეხი იყო, ოქმიდანაც ჩანს. 6 ყვითელი ბარათი მის დაძაბულობაზე მეტყველებს. ამას მისი მიმდინარეობაც დაუმატეთ და აუტსაიდერთა დაპირისპირების სურათიც სახეზე იქნება.
ანგარიში ”სიონის” შუახაზელმა გიორგი ქუცურუამ, შეხვედრის დებიუტშივე გახსნა. მასპინძლებმა შედეგის ტაიმის ბოლომდე შენარჩუნება შეძლეს. განახლდა თუ არა შესვენების შემდეგ შეხვედრა, აშკარა იყო, რომ ”სპარტაკი” მატჩის გადასარჩენად არაფერს დაიშურებდა. თანაც, ვლადიმერ ხაჩიძის შეგირდებს გაუმართლათ - კარის ჩარჩოში 2-ჯერ მოხვედრებული ბურთი ორივეჯერ გოლად იქცა. ანგარიში თეიმურაზ შონიამ 58-ე წუთზე გაათანაბრა, ხოლო აქიდან 5 წუთში, ზვიად მეტრეველმა დასწრებაზე თამაში გოლად აქცია - 1:2.
”სიონი” (ბოლნისი) - ”სპარტაკი” (ცხინვალი) 1:2 (1:0)
20 ნოემბერი. ბოლნისი, ”თამაზ სტეფანია”.
”სიონი”: ვახტანგ ლობჟანიძე, კობაური, გიორგი ოქროპირიძე, გიორგი თარგამაძე, კობერიძე, გაბრიჭიძე (უგულავა, 66), ვალერი ბოლქვაძე, ფეიქრიშვილი (ისიანი, 60), ქუცურუა, გიორგი ჯოკას ძე რეხვიაშვილი, კემუხტაშვილი (კაციტაძე, 66).
მწვრთნელი-კონსულტანტი: ლევან ბაჯელიძე.
”სპარტაკი”: ძაგანია, გიორგი სეფიაშვილი, ტეტუნაშვილი, ზვიად ლობჟანიძე, მერეჩკო, კობა შალამბერიძე, თიბილაშვილი (მამუჩიშვილი, 77), თეიმურაზ შონია, შარაშენიძე, რევაზ ჯიქია (ნიკოლოზ მაისურაძე, 90), მეტრეველი.
მთავარი მწვრთნელი: ვლადიმერ ხაჩიძე.
გოლები: 1:0 ქუცურუა (9), 1:1 შონია (58), 1:2 მეტრეველი (63).
გაფრთხილებები: გაბრიჭიძე (62), რეხვიაშვილი (68), კაციტაძე (75), შარაშენიძე (82), ჯიქია (89), კობაური (90).
მსაჯები: თ. გვანცელაძე; გ. ჩიგოგიძე, ზ. ფიფია; ი. ურუშაძე.


მერანი - ვიტ ჯორჯია
თამამად შეიძლება ითქვას. მიმდინარე ჩემპიონატის აღმოჩენა მარტვილის ”მერანია”. მალხაზ ჟვანიას გაწვრთნილები აღარ ხუმრობენ. გუნდმა ზედიზედ მე-4 მოგება იზეიმა და ცხრილის მე-4 საფეხურზე ”გამაგრდა”. მარტვილელთა მორიგი მსხვერპლი ქვეყნის 2-გზის ჩემპიონი თბილისის ”ვიტ ჯორჯია” აღმოჩნდა. სტუმრებმა უშანსოდ წააგეს ”მერანთან”. ეს, ამ გუნდების მონაწილეობით სეზონში მეორე შეხვედრაა და ”ვეტერინარებმა” ვერ ამჯერად გაუტანეს ჯონი შეროზიას.
სამაგიეროდ, ”მერანმა” გაუტანა თბილისელებს 3 უპასუხო გოლი. ანგარიში კოტდივუარელმა მუნინი ტაპემ, პირველი ტაიმის დასრულებამდე 5 წუთით ადრე გახსნა. სამიოდე წუთში, სხვაობა ორამდე გაზარდა გიორგი მანწკავამ, რომელმაც 54-ე წუთზე დუბლი შეასრულა და საკუთარი გუნდის უპირატესობა უფრო შთამბეჭდავი გახადა - 3:0.
”მერანი” (მარტვილი) - ”ვიტ ჯორჯია” (თბილისი) 3:0 (2:0)
20 ნოემბერი. მარტვილი, ”ცენტრალური”.
”მერანი”: შეროზია, კაკუშაძე, გიგა ჟვანია, თორნიკე შალიკაშვილი, სუხიაშვილი, დიდავა, ელგუჯა გრიგალაშვილი (წოწორია, 80), მანწკავა, ჩალაძე, ამბროლაძე (სამადაშვილი, 62), ტაპე (კუჭუხიძე, 65).
მთავარი მწვრთნელი: მალხაზ ჟვანია.
”ვიტ ჯორჯია”: ძაძამია, ხურცილავა, გოგიაშვილი, ადამაძე, ღანიაშვილი, გურამ გურეშიძე, ვასაძე (მაისაშვილი, 68), გიორგი გურეშიძე, კორიფაძე (ვაშაკიძე, 60), ზაქრაძე (სიხარულიძე, 46), ჩიმაკაძე.
მთავარი მწვრთნელი: ზურაბ ბერიძე.
გოლები: 1:0 ტაპე (40), 2:0 მანწკავა (43), 3:0 მანწკავა (54).
გაფრთხილებები: ღანიაშვილი (86).
მსაჯები: ა. ნონიკაშვილი; ი. უკლება, დ. კვეტენაძე; ხ. გაგნიძე.


XIV ტური
20 ნოემბერი
კოლხეთი - ბაია 0:0
მეტალურგი - გაგრა 1:1 (0:1)
სიონი - სპარტაკი 1:2 (1:0)
მერანი - ვიტ ჯორჯია 3:0 (2:0)
დილა - ზესტაფონი 0:2 (0:1)
დინამო - ტორპედო 2:0 (1:0)

შენიშვნები
• სფფ-ს რეგლამენტით, თანაბარი ქულების დაგროვების შემთხვევაში, ადგილები გაირკვევა შემდეგი პრიორიტეტული თანმიმდევრობით: 1. მოგებათა მეტი რაოდენობა; 2. უშუალოდ ერთმანეთში შეხვედრების შედეგები (ქულათა რაოდენობა, ბურთების სხვაობა); 3. ჩემპიონატში გატანილი და მიღებული ბურთების სხვაობა; 4. გატანილი გოლების რაოდენობა; 5. სტუმრად გატანილი გოლების რაოდენობა; 6. ფეირ ფლეის პრინციპი; 7. კენჭისყრა.
• 2 წრის შემდეგ, I-VIII ადგილზე გასული გუნდები, ურთიერთშეხვედრებში დაგროვილი ქულებით და გატანილ-გაშვებული ბურთებით, ორ წრედ იბრძოლებენ ჩემპიონის ტიტულისა და უეფას ევროპის ლიგის საგზურებისთვის. ბოლო 4 გუნდი კი, პირველი ლიგის ზონებში დაწინაურებულ ორ-ორ გუნდთან ერთად (8 გუნდი ორ წრედ ნულიდან), გაითამაშებენ უმაღლესი ლიგის ოთხ საგზურს.

სატურნირო ცხრილი II ეტაპისთვის გუნდების მიმდინარე მდგომარეობის გათვალისწინებით
 

ბომბარდირები
9 - ჩისკო (დინამო), დიმიტრი ტატანაშვილი (მეტალურგი) (1 პენ.);
8 - ჯაბა დვალი (ზესტაფონი) (1 პენ.);
6 - გიორგი მანწკავა (მერანი), ნიკოლოზ გელაშვილი (ზესტაფონი) (2 პენ.);
5 - ალვარო (დინამო), ირაკლი მოდებაძე (მეტალურგი), რატი წინამძღვრიშვილი (ზესტაფონი) (1 პენ.);
4 - ელგუჯა გრიგალაშვილი (მერანი), ზვიად მეტრეველი (სპარტაკი), გიორგი ქუცურუა (სიონი);
3 - რომან ახალკაცი (დილა), შოთა გრიგალაშვილი (ზესტაფონი), რევაზ გოცირიძე (ტორპედო), ლუკა გუგუჩია (ბაია), გიორგი დათუნაიშვილი (ტორპედო), გრიგოლ დოლიძე (ტორპედო), შალვა კვანტალიანი (გაგრა), ალექსანდრე კოშკაძე (დინამო), დავით რაჟამაშვილი (დილა), მუნინი ტაპე (მერანი), ირაკლი ქობალია (ბაია), ლევან შარიქაძე (გაგრა), დათა ციცხვაია (კოლხეთი), კოტო (დინამო) (1 პენ.), გიორგი მეგრელაძე (ტორპედო) (1 პენ.), ბესიკ ჩიმაკაძე (ვიტ ჯორჯია) (1 პენ.).