10:51 PM ტაიმ–ბოლი თუ მსაჯთა ტაიმი? | |
 ძნელია
იმის მტკიცება, მოქმედმა ჩემპიონმა ზუგდიდში მხოლოდ მსაჯის შეცდომის
შედეგად გაიტანა მეორე გოლი და წაგებული მატჩი სათავისოდ გაიხადა, მაგრამ
„ბაია–ზესტაფონის" მატჩის მთავარ არბიტრს თორნიკე გვანცელაძეს, ზუგდიდელი ქომაგებისგან თავს რისხვა კი დააყტდა.
81–ე წუთამდე მასპინძლები ამარცხებდნენ ფეროელებს და რატი წინამძღვრიშვილის
გოლმა კი იმერლებს თამაშის გადარჩენის შანსი მისცა. თამაშის ბოლო წუთებზე
მომხდარ ინციდენტზე კი მთავარ არბიტრს პასუხი არც გაუცია. საქმე იმაში
გახლავთ, რომ ზესტაფონელმა ფეხბურთელებმა ბოლო იერიში მიიტანეს მეტოქის
კართან და იმერელთა ფორვარდმა ნიკა გელაშვილმა მახვილი კუთხიდან „ბაიას" კიპერს დაურტყა. სომხიშვილმა ბურთი მოიგერია და იქვე ახლოს მყოფმა არბიტრმა კუთხურზე მიუთითა. „ბაიას" მეკარემ მსაჯს
ანიშნა, რომ ბურთი გადასული იყო, მაგრამ სტუმრებმა კუთხურის უფლება
გამოიყენეს და გამარჯვების გოლიც აქედან გაიტანეს. თავი კი შეცვლაზე
შემოსულმა თემურ ღონღაძემ
გამოიჩინა. ბურთი ჩაითვალა და მსაჯმა რამდენიმე წუთში საფინალო სასტვენიც
მისცა. სწორედ აქედან წამოვიდა ზუგდიდელი ქომაგების პროტესტიც, თუმცა საქმე
გართულებამდე სამართალდამცავებმა არ მიიყვანეს. გულშემატკივრები კი გვანცელაძეს, არდანიშნულ პენალტებზეც ედავებოდნენ, როცა ჯერ წურწუმიას დარტყმული ბურთი ზესტაფონელ მცველს მოხვდა და ფეხბურთელებიც ანიშნებდნენ არბიტრს ხელით თამაშზე, შემდეგ კი ქობალიას
საჯარიმოში წაქცევასაც მოჰყვა მაყურებელთა პროტესტი. ორივე ეპიზოდში კი
მსაჯმა თამაშის გაგრძელება ბრძანა, არადა ამ საკამათო ეპიზოდებისას
ზუგდიდელები შეხვედრას იგებდნენ.
თამაში კი თავიდანვე საინტერესო და დაძაბულად წარიმართა და ეს მუხტი შეხვედრას ბოლომდე შემორჩა. მასპინძლებმა ირაკლი ქობალიას ჩინებული თამაშის შედეგად 19–ე წუთზე გაიხარეს, როცა ამ უკანასკნელმა საკუთარი გუნდის შეტევა გოლით დაასრულა. მანამდე ორი წუთით ადრე იმავე ქობალიას გოლის გატანის რეალური შანსი ჰქონდა, როცა ზვიად სიხარულიას ზუსტი პასით ის კვასხვაძესთან პირისპირ დარჩა, მაგრამ მისი დარტყმული ბურთი ბადეს გარედან მოხვდა. წაგების მიუხედავად საკუთარი გუნდის თამაშით არ გულშემატკივრები და არც მასპინძელი გუნდის დამრიგებელი ელგუჯა ქომეთიანი დარჩენილან უკმაყოფილო. „ბაიას" კაპიტანი გიორგი სომხიშვილი მედიის წარმომადგენლებსაც იმ ეპიზოდს უხსნიდა, თუმცა ამით არაფერი შეცვლილა და ზესტაფონმა, გასვლაზე სამი ქულა მიითვალა. მორიგ შეხვდედრას „ბაია" 15 ოქტომბერს გორში ადგილობრივ „დილასთან გამართავს. | |
|
| |
| Total comments: 0 | |