ქუთაისის "ტორპედომ” მიმდინარე სატრანფერო პერიოდში ამპლუით მარჯვენა მცველი დათა რიგვავა დაიმატა. 20 წლის ფეხბურთელი აქამდე ზუგდიდის "ბაიას” რიგებში გამოდიოდა, სადაც 34 საჩემპიონატო და სათასო მატჩი გამართა და 3 გოლის გატანა შეძლო. რიგვავამ იმერულ კლუბთან 3+2 წლიანი სისტემის კონტრაქტი გააფორმა.

ქუთაისელთა ოფიციალური ვებ-გვერდის ცნობით, მეორე ფეხბურთელი, რომელიც კარიერას "ტორპედოში” გააგრძელებს, გიორგი ლემონჯავაა. მას დღემდე ფოთის "კოლხეთში" აქვს ნათამაშები და ზღვისპირელთა რიგებში სულ 15 ოფიციალური მატჩი ჩაატარა. 21 წლის მცველმა 5-წლიან კონტრაქტს მოაწერა ხელი.

უახლოეს დღეებში გახდება ცნობილი იმ ფეხბურთელთა სია, რომლებთანაც ქუთაისის "ტორპედო" ურთიერთობას გაწყვეტს და ამ ცვლილებათა შესახებაც ოპერატიულად გაცნობებთ.
აქვე გეტყვით ტორპედოელთა უახლოეს გეგმებზეც. ზამთრის არდადეგების შემდეგ, "ტორპედოს” პირველი გუნდი თბილისში, 4 იანვარს შეიკრიბება. სამედიცინო შემოწმების პარალელურად, ქუთათურები საბურთალოს სკოლის მოედანზე ივარჯიშებენ. 9 იანვარს "ტორპედო” ქუთაისში დაბრუნდება და ეროვნული ჩემპიონატის დასკვნითი ტურებისთვის მზადებას განაგრძობს, 22 იანვრიდან კი რიონისპირული გუნდი თურქეთის ქალაქ ანტალიაში, ათდღიანი შეკრების გასავლელად გაემგზავრება.