3:36 AM რატის უიღბლობა და ჯაბას ბენეფისი | |
 ბოლოსწინა ტურის უკანასკნელი შეხვედრა ზესტაფონში გაიმართა. დავით აბაშიძის სახელობის სტადიონზე ქვეყნის ჩემპიონმა საუკეთესო 8 კლუბს შორის დასარჩენად მებრძოლ ცხინვალის ,,სპარტაკს’’ უმასპინძლა. მოგეხსენებათ, ეს მატჩი გასულ კვირას უნდა გამართულიყო, მაგრამ იმერეთში უხვად მოსული თოვლის გამო, სფფ-მ მისი ჩატარება მიზანშეუწონლად მიიჩნია და შეხვედრა 2 მარტისთვის გადმოიტანა. მიუხედავად იმისა, რომ ზესტაფონში საფეხბურთო ამინდი არც ამ დღეს ეთქმოდა, თამაში ძალიან სანახაობრივი გამოდგა და მატჩზე დამსწრე სფფ-ს მაღალჩინოსნები, მაყურებელთან ერთად, კმაყოფილი დატოვა.
შეხვედრა ფეროელთა შეტევებით დაიწყო, თუმცა, პირველი სახიფათო მომენტი
სტუმრებმა შექმნეს. მე-12 წუთზე, ჩაფიძე მარცხენა ფლანგზე გაიჭრა და პირით
ხაზთან მისულმა, საჯარიმოში გამჭოლი გადაცემა გააკეთა. მეკარის ბაქანზე
შემოვარდნილი მელქაძე მეტოქის კარის დალაშქვრას ვარდნაში ცდილობდა, მაგრამ
ბურთს ვეღარ მისწვდა.
პრაქტიკულად მაშინვე, საპასუხო შეტევისას, მასპინძლებმა ანგარიში გახსნეს.
ცხინვალელი მცველების მოგერიებულ ბურთს გორგიაშვილი საჯარიმოს კუთხესთან
დაუხვდა და ზუსტი გადაცემით, გრიგალაშვილი ხელსაყრელ პოზიციაში გაიყვანა.
ეროვნული ნაკრების ნახევარმცველმა თანაგუნდელს ამაგი დაუფასა და გამოზომილი
დარტყმით, სტუმართა კარის ბადე შეარხია - 1:0
5 წუთის შემდეგ, თავის გამოჩენის შესაძლებლობა წინამძღვრიშვილსაც მიეცა.
თანაგუნდელებმა მას გოლის გატანის იდეალური მომენტი შეუქმნეს, მაგრამ
ნადირაძესთან პირისპირ გასულმა, როგორღაც, ბურთის კარისათვის აცილება
,,მოახერხა’’. თუმცა, მასპინძლებმა მალევე გაიხარეს. დვალი მოედნის
ცენტრიდან დაიძრა, დრიბლინგით რამდენიმე მეტოქეს გვერდი აუარა და
გრიგალაშვილთან ,,კედელის’’ გათამაშების შემდეგ, მეკარესთან პირისპირ
აღმოჩნდა. ზესტაფონელთა ფორვარდმა ცრუმოძრაობით სტუმართა გოლკიპერიც
ჩამოიტოვა და ცარიელ კარში ბურთი აუღელვებლად შეაგორა - 2:0
ამის შემდეგ თამაში გარდამავალი უპირატესობით წარიმართა. მომენტები,
როგორც ერთ ასევე მეორე კართან იქმნებოდა. ორივე გუნდის ფეხბურთელებს ცდა
და მონდომება არ დაუკლიათ, მაგრამ გაცილებით უფრო მაღალი კლასის
შემსრულებლები ზესტაფონელებს ჰყავდათ. მასპინძელთა რიგებში განსაკუთრებით
დვალი და წინამძღვრიშვილი გამოირჩეოდნენ. ჯაბამ, ალბათ, თავისი კარიერის
ერთ-ერთი საუკეთესო მატჩი ჩაატარა. იგი მოედნის ყოველ მონაკვეთზე იბრძოდა.
თვითონვე იწყებდა შეტევებს, თანაგუნდელებს ზუსტი გადაცემებით ამარაგებდა,
ირჩევდა სწორ პოზიციას და დამამთავრებელ ფაზაშიც სხვებზე უკეთ ირჯებოდა.
რაც შეეხება წინამძღვრიშვილს, იშვიათია, რომ ფეხბურთელს ერთ მატჩში ამდენი
საგოლე მომენტი გაენიავებინოს. 31-ე წუთზე, თანაგუნდელებმა რატის კარის
აღების 100 %-იანი შანსი შეუქმნეს, მაგრამ მასპინძელთა შემტევმა
დამამთავრებელ ფაზაში მეკარეს ვეღარ აჯობა. იქვე, დვალის მახვილგონივრული
გადაცემის შემდეგ, წინამძღვრიშვილმა ნადირაძეც უკან ჩამოიტოვა, თუმცა,
დარტყმა მისთვის უხერხული მარჯვენა ფეხით ძალიან სუსტად შეასრულა, ცარიელი
კარისკენ მგორავ ბურთს მცველები წამოეწივნენ და სიტუაცია განმუხტეს.
შეხვედრის მე-2 ნახევარიც ანალოგიური სცენარით გაგრძელდა. საწყის ხუთ
წუთში ზედიზედ 2 გაცუდებული მომენტის შემდეგ, რატის მესამე მცდელობა
შედეგიანი გამოდგა. ნადირაძესთან მორიგი დუელისას, სტუმართა კიპერმა
წინამძღვრიშვილი აკრძალული ილეთით შეაჩერა, არბიტრმა ხელი თერთმეტმეტრიანი
ნიშნულისკენ გაიშვირა, პენალტი კი დვალმა უზადოდ შეასრულა - 3:0.
ამის შემდეგ, ზესტაფონელთა დამრიგებელმა - გიორგი ჭიაბრიშვილმა
წინამძღვრიშვილი მოედნიდან გაიყვანა და თავის გამოჩენის შანსი გამოცდილ
დავით მუჯირს მისცა. შეცვლამ რატი გააბრაზა, თუმცა, ვიმედოვნებთ, რომ
ახალგაზრდა ფეხბურთელისთვის ეს უიღბლობა დროებითია და მალე ზესტაფონელთა
ფორვარდი ისევ ძველებურად გაიტანს.
ხუთ წუთში, პენალტით მასპინძლებიც დაჯარიმდნენ და მელქაძემ ზუსტი დარტყმით ერთი გოლის გაქვითვა მოახერხა - 3:1.
69-ე წუთზე, მოედანზე ერთობ საჩოთირო სიტუაცია შეიქმნა. მაისურაძის
მოწოდებულზე ლომაიამ თავური დარტყმით მასპინძელთა კარი მეორედ დალაშქრა,
თუმცა, შეხვედრის არბიტრმა, ასისტენტზე დაყრდნობით, თამაშგარე დააფიქსირა,
რითაც ცხინვალელთა გუნდი ერთობ გაანაწყენა.
76-ე წუთზე, ზესტაფონელებმა ანგარიში გაზარდეს. ელიავა კარგად ჩაერთო
შეტევაში და საჯარიმოს რკალთან მდგომ მუჯირს ზუსტი გადაცემა გაუკეთა.
გამოცდილმა ,,მუმუმ’’ თანაგუნდელის პასი შეირგო და შეუჩერებელი დარტყმით,
ბურთი ცხინვალელთა კარის ბადეში გაახვია - 4:1.
სტუმრებმა ერთიც გაიბრძოლეს და პირისპირ გასულმა შარაშენიძემ მამალაძის
დამწუხრებაც მოახერხა, თუმცა, თამაშის შედეგზე ეს გავლენას ვეღარ
მოახდენდა. პირიქით, შეხვედრის მიწურულს, მუჯირის მახვილგონივრული
გადაცემის შემდეგ, დვალმა ბურთი მარჯვნიდან მარცხენა ფეხზე გადმოიტანა და
ზუსტი დარტყმით ჰეთ თრიკიც მიითვალა, თანაც 12 გატანილი გოლით, ბომბარდირთა
დავაშიც დაწინაურდა.
"ზესტაფონი” (ზესტაფონი) - "სპარტაკი” (ცხინვალი ) 5:2 (2:0)
2 მარტი. ზესტაფონი. ,,დავით აბაშიძე’’. 1000 მაყურებელი
"ზესტაფონი”: მამალაძე (კ), ღონღაძე, გ. ონიანი, საჯაია,
ელიავა, მენთეშაშვილი (ბერაია 50), გორგიაშვილი (რაჟამაშვილი 71), შ.
გრიგალაშვილი, შარიქაძე, წინამძღვრიშვილი (მუჯირი 53), დვალი.
მთავარი მწვრთნელი: გიორგი ჭიაბრიშვილი
"სპარტაკი”: გ. ნადირაძე, ჭაფოძე, ორბელაძე (ბურძენაძე
46), დ. ლომაია, მაისურაძე, ტეტუნაშვილი (დ. გელაშვილი 40), შარაშენიძე,
შონია (კ), გურეშიძე (გაბაშვილი 68), ჩაფიძე, მელქაძე.
მთავარი მწვრთნელი: ვლადიმერ ხაჩიძე
გოლები: 1:0 გრიგალაშვილი (13), 2:0, 3:0, დვალი (19, 52 პ), 3:1 მელქაძე (57 პ), 4:1 მუჯირი (76), 4:2 შარაშენიძე (85), 5:2 დვალი (88).
გაფრთხილება: მაისურაძე (2), ნადირაძე (51), დვალი (61).
არბიტრი: ალექსანდრე კრიჭაშვილი
ბომბარდირები
მეორე ეტაპის დასკვნითი ტური 6 მარტს გაიმართება: | |
|
| |
| Total comments: 0 | |