Main » 2012 » მარტი » 13 » მეტალურგი "რუსთავი" - ბაია "ზუგდიდი" 4-0 (ვიდეომიმოხილვა)

---

12:21 PM მეტალურგი "რუსთავი" - ბაია "ზუგდიდი" 4-0 (ვიდეომიმოხილვა)

"ბაიას” ლიგიდან გავარდნა აღარ ემუქრება და შეიძლება ჩაითვალოს, რომ ზუგდიდელებმა მიმდინარე სეზონში ამოცანა-მაქსიმუმი შეასრულეს. აქედან გამომდინარე, ძნელი სავარაუდო არ იყო, რომ გაცილებით ამბიციური "მეტალურგი” საკუთარ მოედანზე 3 ქულის აღების შანსს არ გაუშვებდა. მართლაც, ცივ და თოვლიან ამინდში რუსთაველებმა მეტოქეს პირწმინდად აჯობეს და დაფიქსირებული ანგარიში მატჩის მიმდინარეობას სრულად შეესაბამება. შეხვედრის დებიუტში მარცხენა ფლანგიდან გიორგი ოთარაშვილის პასის შემდეგ, მეტოქის საჯარიმოში გიორგი თექთურმანიძემ ბურთი დაამუშავა და შემოტრიალებით არაზუსტად დაარტყა. მალევე, ირაკლი მაისურაძე დაემუქრა სტუმართა კარს საჯარიმოს მისადგომებიდან და "ბაიას” მეკარემ ბურთი ხელებში დააფიქსირა. მე-12 წუთზე, სომხიშვილმა თამაშში შეიყვანა ბურთი, რომელიც გიორგი გაბედავამ მახვილგონივრულად გაატარა და ლაშა კუკავამ მისი გადაგდება კარიდან გამოსული გრიგოლ ბედიაშვილის თავსზემოთ ვერ მოახერხა. ანგარიში 24-ე წუთზე გაიხსნა, როდესაც ზუგდიდელთა საჯარიმოს ხაზთან მყოფი მაისურაძის დარტყმული ბურთი ხარიხას მოხვდა და უკან გადმოვარდა, ხოლო კართან ახლოსმდგომმა ირაკლი სიხარულიძემ თავით გაიტანა. 26-ე წუთზე, მარცხნიდან ლაშა ჯაფარიძის პასის შემდეგ, ოთარაშვილმა გვერდი ერთ მეტოქეს აუარა და ზუგდიდელთა საჯარიმოში შესულმა დაარტყა – "ბაია” გაშვებული გოლისგან სომხიშვილმა იხსნა. მე-40 წუთზე, ვალიკო ტყემალაძისა და ოთარაშვილის შეჯახების შემდეგ, რუსთაველმა ნახევარმცველმა მძიმე ტრავმა მიიღო, რის გამოც მოედნიდან საკაცით გაიყვანეს. მეორე ტაიმის განახლებიდან 10 წუთი იყო გასული, რომ საჯარიმოს შესრულებისას მარჯვენა ფრთიდან თექთურმანიძემ ბურთი მეტოქის კართან ჩაკიდა, სადაც გამოსვლაზე სომხიშვილი შეცდა, რასაც "ბაიას” საჯარიმოში არეულობა მოჰყვა – ჯერ სიხარულიძემ დაარტყა თავით, მერე ქავთარაძემ, მაგრამ საბოლოოდ, ზუგდიდელმა მცველებმა ორივე შემთხვევაში ბურთი თითქმის კარის ხაზიდან გამოიტანეს. 62-ე წუთზე, შეტევაში ჩართულმა ჯაფარიძემ მარცხენა ფლანგიდან ცენტრისკენ შეიწია და ახლო კუთხეში დაარტყა – სომხიშვილმა ბურთი კუთხურზე მოიგერია. "სტანდარტული” მაისურაძემ შეასრულა და გივი კვარაცხელიამ ნახტომში მახვილი კუთხიდან თავით ლამაზი გოლი გაიტანა. 77-ე წუთზე, რუსთაველთა მორიგი კუთხურის მერე, დიმიტრი ტატანაშვილის თავიდან ბურთი ხარიხას მოხვდა, სიხარულიძემ კი, თავით ზუსტად დაამატა. ორიოდე წუთში, ხელსაყრელი პოზიციიდან ტატანაშვილის დარტყმული ბურთი სომხიშვილმა კუთხურზე გადააგდო. კიდევ ერთი "სტანდარტულის” მერე, სიხარულიძემ თავით კინაღამ ჰეთ-თრიქი მიითვალა. 83-ე წუთზე, ზუგდიდელებმა საჯარიმო დარტყმა შეასრულეს და ირაკლი ეხვაიამ თავით ბურთი ბედიაშვილის კარში გადაგზავნა, მაგრამ გვერდითმა მსაჯმა თამაშგარე დააფიქსირა და გოლი არ ჩაითვალა. ძირითადი დროის დასრულებამდე ბევრი არაფერი რჩებოდა, როცა თექთურმანიძემ მოედნის ცენტრიდან წამოიღო ბურთი, გზად ერთ მოწინააღმდეგეს გაცდა და დაახლოებით 27 მეტრიდან ულამაზესი გოლი გაიტანა. არბიტრის მიერ დამატებულ წუთებზე ეხვაიას შორეული დარტყმის შემდეგ, ბედიაშვილმა მასპინძლები გაშვებული გოლისგან ნახტომში იხსნა. გოჩა ტყებუჩავა: "თავს არ ვიმართლებ, მაგრამ ზუგდიდში სამი დღე თოვდა და ვარჯიშის საშუალება არ გვქონდა. სუსტად ვითამაშეთ. რაღაცას აუცილებლად შევცვლით. შეუძლებელია, ფეხბურთელს სირბილი არ უნდოდეს”. კობა ჟორჟიკაშვილი: "ჩემპიონატის დასკვნითი ეტაპი დაიწყო და ჩვენთვის ყოველ ქულას დიდი მნიშვნელობა აქვს. "ბაიას” ახალგაზრდა გუნდს ფსიქოლოგიური წნეხი მოხსნილი ჰქონდა, ვინაიდან, სიმართლე რომ ითქვას, საპრიზო ადგილებისთვის არ იბრძვის. მეტოქეს თავიდანვე პრესინგი დავუპირისპირეთ, საგოლე მომენტები გამოვიყენეთ და საბოლოოდ გავიმარჯვეთ”. მეტალურგი (რუსთავი) – ბაია (ზუგდიდი) 4:0 (1:0) 12 მარტი. რუსთავი. სტადიონი "ფოლადი”. მეტალურგი: ბედიაშვილი, მახვილაძე, ჯაფარიძე, გივი კვარაცხელია (კ), სიხარულიძე, სევასტი თოდუა, ირაკლი მაისურაძე, რაზმაძე (ექვთიმიშვილი, 84), ქავთარაძე (ტატანაშვილი, 74), ოთარაშვილი (გავაშელიშვილი, 42), თექთურმანიძე. მთავარი მწვრთნელი: კობა ჟორჟიკაშვილი ბაია: სომხიშვილი (კ), პაჭკორია, ტყემალაძე (ზურაბ ქვარცხავა, 45), კუტალია (გუჯეჯიანი, 61), სიხარულია, კუკავა, შოთა ლომია (ეხვაია, 77), აფაქიძე, ლევან ტყებუჩავა, აკობია, გაბედავა. მთავარი მწვრთნელი: გოჩა ტყებუჩავა გოლები: 1:0 სიხარულიძე (24), 2:0 კვარაცხელია (62), 3:0 სიხარულიძე (77), 4:0 თექთურმანიძე (89). გაფრთხილება: ტყემალაძე (40), აფაქიძე (50), აკობია (53) მთავარი მსაჯი: ლაშა სილაგავა

1 2 3 4 5 Category: სიახლეები | Views: 1331 | Added by: John_Cena | Rating: 0.0/0

Total comments: 2
Comments display order: By default New comments first Old comments first shemdeg tamashs rodis gamartavs baia da vistan? სრულად ნანახია: | ავტორი: | Дата: ოთხშაბათი | კომენტარები () RA XDEBA RA MABAVIA OR TAMASHI 9 BURTIS GASHVEBA სრულად ნანახია: | ავტორი:chita666 | Дата: სამშაბათი | კომენტარები ()