22 წლის ფლანგელი ნახევარმცველი ლევან კუტალია ზუგდიდის "ბაიაში" ითამაშებს. როგორც თავად ფეხბურთელმა "მსოფლიო სპორტს" უთხრა, "ბაიაში" ზაფხულამდე დარჩება და შემდეგ გაირკვევა, სად გააგრძელებს კარიერას.
"ბოსნიური "ზრინსკიდან" წამოსვლის შემდეგ, ერთი თვეა, "ბაიაში" ვვარჯიშობ და გადავწყვიტე, ამ კლუბში სეზონის ბოლომდე ვითამაშო".
კუტალია ზუგდიდელია და ბოსნიაშიც სწორედ მშობლიური ქალაქის კლუბიდან (მაშინდელი "მგლებიდან") წავიდა. ჯერ სარაევოს "სლავიაში" გახლდათ და პირველივე სეზონში ბოსნიის ჩემპიონატის საუკეთესო ლეგიონერებში მეორე ადგილზე გავიდა, ხოლო 2011 წლის დასაწყისში "ზრინსკიში" გადავიდა და კლუბში არსებული ფინანსური პრობლემების გამო წამოვიდა.
კუტალიას საქართველოს ახალგაზრდულ ნაკრებშიც უთამაშია.
"ბაიამ" უცხოეთში ნათამაშები ფეხბურთელი კი დაიმატა, მაგრამ ამ ზამთარს ბევრ ფეხბურთელს შეელევა: ლუკა გუგუჩიასა და გურამ სამუშიას "ზესტაფონში" გადასვლა გადაწყვეტილია, ასევე თითქმის გადაწყვეტილია, რომ ზვიად სიხარულიაც წავა, თუმცა სად, ჯერ უცნობია, ხოლო ირაკლი ქობალიას ტრავმა აქვს და ალბათ, სეზონის ბოლომდე ვერ ითამაშებს.