რთული ფინანსური მდგომარეობის მიუხედავად, გასულ სეზონში ზუგდიდის "ბაიამ” ბევრი გააკვირვა და საქართველოს ეროვნული ჩემპიონატის წამყვან კლუბებს ტოლი არ დაუდო. საბოლოოდ, გუნდმა, რომელსაც ზოგჯერ თამაშზე წასასვლელად ავტობუსში ბენზინის ჩასასხმელი თანხა არ ჰქონდა, არათუ ლიგაში შეინარჩუნა ადგილი, არამედ პირველ ხუთეულში მოხვედრამდე ცოტა დააკლდა. ვერ ვიტყვით, რომ მიმდინარე სეზონში "ბაიას” ფული თავზესაყრელი აქვს, რადგან გუნდმა სრულფასოვნად მოსამზადებელი პერიოდიც კი ვერ გაიარა, მაგრამ ჩემპიონატი რიხით დაიწყო და სატურნირო ცხრილის ზედა ნაწილში ადგილი სრულიად დამსახურებულად უკავია. ამას თუნდაც განვლილი ტური ადასტურებს, როდესაც "ბაიამ” საკუთარ მოედანზე თბილისის "დინამო” ბოლო წუთებზე გატანილი გოლით დაამარცხა. "მსოფლიო სპორტი” "ბაიას” დამრიგებელ ელგუჯა ქომეთიანს გაესაუბრა:
- სეზონი მართლაც კარგად დაიწყეთ და რით ახსნით გუნდის წარმატებულ თამაშს?
- მართალი გითხრათ, მეც არ ველოდი, ასეთ წარმატებას თუ მივაღწევდით, გამომდინარე იქიდან, რომ მწირი დაფინანსების გამო, სეზონისთვის სათანადოდ ვერ მოვემზადეთ. შესაძლოა, მთავარი მწვრთნელისგან ამაზე საუბარი უხერხულია, მაგრამ რეალობას ვერ გავექცევით. იმას ვერ ვიტყვი, რომ ბიჭების არ მჯეროდა, თუმცა ვიმეორებ, მსგავს წარმატებულ თამაშს არ ველოდი.
- თქვენი აზრით, საუკეთესო თამაში ზუგდიდში თბილისის "დინამოსთან” ჩაატარეთ, რომელიც 2:1 მოიგეთ, თუ სხვა მატჩი უფრო იყო დასამახსოვრებელი?
- "დინამოსთან” საუკეთესო თამაში არ გვითამაშია, უბრალოდ, შედეგი იყო საუკეთესო. თამაშის ხარისხი "ზესტაფონთან” შეხვედრისას უკეთესი იყო, ვიდრე "დინამოსთან”. იმ მატჩში უფრო ვიმსახურებდით მოგებას. თუმცა, მაშინ არ გაგვიმართლა, ხოლო ახლა ფორტუნამ გაგვიღიმა.
- გასულ სეზონსაც თუ გავიხსენებთ, "დინამოს” ზუგდიდის "ბაიასთან” ჩატარებული მატჩებიდან იოლი არცერთი ყოფილა...
- სხვათა შორის, გასულ სეზონში "დინამოსთან” წაგებულ მატჩებში თამაშის ხარისხი უკეთესი იყო, ვიდრე შაბათს მოგებულ შეხვედრაში. ნებისმიერი მატჩის წინ ფეხბურთელებს ვეუბნებით, რომ მეტოქის განურჩევლად, მოედანზე გავიდნენ და საკუთარი თამაში აჩვენონ. თუმცა. "დინამო” მაინც "დინამოა” და დამატებითი მოტივაციაა. შეიძლებოდა, რომ გარკვეული სიფრთხილე გამოგვეჩინა და წარუმატებლობისგან თავი დაგვეზღვია. თუმცა, ბიჭები ფსიქოლოგიური ტვირთისგან გავათავისუფლეთ და ვუთხარით, რომ მთავარი იყო, თავისი თამაშით მაყურებლისგან ტაში დაემსახურებინათ, თუნდაც წაეგოთ.
- რამდენად მზადაა გუნდი, რომ თამაში სტაბილურად გააგრძელოს?
- ყველაფერი იმაზეა დამოკიდებული, როგორ ვითამაშებთ პირველ ეტაპს და პირველ 8 გუნდში დამკვიდრებას თუ მოვახერხებთ, ქულათა რა მარაგს დავაგროვებთ. გარდა ამისა, მნიშვნელოვანია, რა კონტინგენტი გვეყოლება, რადგან დასამალი არაა, რომ ჩვენი გუნდის ფეხბურთელებზე მოთხოვნა არსებობს და შესაძლოა, ზოგიერთმა დაგვტოვოს. იმისთვის ვმუშაობთ, რომ ფეხბურთელები წინ წავიდნენ და თამაში უკეთეს გუნდში გააგრძელონ. ნამდვილად არ გვინდა, რომ "ბაიაში” დაბერდნენ. თუმცა, მოთამაშეებს ყოველთვის ვეუბნებით, რომ მათ ჯერ საქართველოში უნდა გამოიჩინონ თავი და სხვაგან წასვლაზე შემდეგ იფიქრონ. გვინდა, რომ "ბაიადან” მოთამაშე ჩამოყალიბებული და თავდაჯერებული წავიდეს. ნამდვილად არ გვსურს, რომ ფეხბურთელმა "იქნებ რამე გამომივიდეს”-ზე "იაროს”. თორემ, ბევრს დაუსრულებია კარიერა ნაადრევად.
- როგორი ფინანსური მდგომარეობაა კლუბში? ხელფასებსა და პრემიებს დროულად იღებთ?
- გასულ სეზონთან შედარებით, მდგომარეობა საგრძნობლად გაუმჯობესდა. ხელფასები არ გვიანდება. რაც შეეხება პრემიებს, "დინამოსთან” თამაშისთვის პრემია ჯერ არ დარიგებულა, დანარჩენი საბონუსო თანხა ბიჭებმა ორშაბათს აიღეს. ამ მხრივ შარშანდელთან შედარებაც არ შეიძლება.
- სეზონის დაწყებამდე კონკრეტულად რა მიზანი გქონდათ და ხომ არ შეცვლილა ამოცანები?
- რაოდენ გასაკვირიც უნდა იყოს, პირველ 8 გუნდში მოხვედრას ვისახავდი მიზნად. იმასაც გეტყვით, რომ ძალიან მეშინოდა, რომ ამ ამოცანას ვერ შევასრულებდით. ამას იმიტომ ვამბობ, რომ იგივე მეკარე სომხიშვილი ზუგდიდში სეზონის პირველ თამაშამდე წინა დღეს ჩამოვიდა. ხომ წარმოგიდგენიათ, რა სიტუაციაში ვიყავით. შემიძლია ვთქვა, რომ მგელაძემ, ტყემალაძემ, აკობიამ საკმაოდ გაგვაძლიერეს. ნიჭიერი ახალგაზრდა ფეხბურთელებიც გვყვავს და საბოლოოდ ისე გამოვიდა, რომ სეზონი კარგად დავიწყეთ. თუმცა, ჯერ ეს დასაწყისია და არაფერია დამთავრებული. თავს მოდუნების საშუალებას წამითაც არ ვაძლევთ.
- რამდენად მართალია გავრცელებული ინფორმაცია, რომ თითქოს ცოტა ხნის წინ, კლუბის ხელმძღვანელობას "ბაიადან” თქვენი გაშვება სურდა?
- წასვლა თავად მინდოდა და ხელმძღვანელობას ვუთხარი, შეიძლება, ახალი სისხლია საჭირო-მეთქი. ეს "ვიტ ჯორჯიასთან” წაგებული თამაშის შემდეგ მოხდა, რადგან ძალიან გულგატეხილი ვიყავი. ეტყობა, ხელმძღვანელობამ ჩემი თხოვნა გულთან ახლოს მიიტანა. თუმცა, ბიჭებმა განაცხადეს, რომ ჩემთან ერთად თავს უკეთ გრძნობენ და ამიტომ დავრჩი. კლუბის ხელმძღვანელობას ნამდვილად არ უცდია, რომ გავეშვი, ეს ჩემი ინიციატივა იყო, რადგან "ვიტ ჯორჯიასთან” ასეთი თამაში წავაგეთ...