Main » 2012 » თებერვალი » 26 » დინამო "თბილისი" - ბაია "ზუგდიდი" 5:1 (ფოტომიმოხილვა+ვიდეომიმოხლივა)

---

11:12 PM დინამო "თბილისი" - ბაია "ზუგდიდი" 5:1 (ფოტომიმოხილვა+ვიდეომიმოხლივა)

სეზონის განახლების შემდეგ, "დინამომ” მიჯრით მესამე მატჩი მოიგო. თამაშამდე თბილისელები ფავორიტებად მიიჩნეოდნენ და გიორგი დევდარიანის შეგირდებმა სტატუსი გაამართლეს. "ბაიამ” მხოლოდ ერთი ტაიმი შეინახა კარი მშრალად, ხოლო შესვენების შემდეგ მასპინძელთა წნეხს ვეღარ გაუძლო. დინამოელთა რიგებში ყველაზე გამორჩეული ფიგურა გოგიტა გოგუა იყო, რომელმაც გარდა იმისა, რომ მუდმივად ცდილობდა, მარცხენა ფლანგზე ვითარება გაემწვავებინა, გოლი გაიტანა, საგოლე პასი მიითვალა და პენალტი "მოინადირა”. "დინამოს” დაწინაურება უკვე მე-2 წუთზე შეეძლო, როდესაც დავით ოდიკაძემ "ბაიას” მეკარესთან პირისპირ ჩისკო დატოვა, მაგრამ ესპანელს გიორგი სომხიშვილმა აუღო. 4 წუთში, უკვე ჩისკომ გაუწია ასისტენტობა ოდიკაძეს, ვის მიერაც ახლო მანძილიდან დარტყმული ბურთი კარის ბადეს გარედან მოხვდა. აღსანიშნავია, რომ საწყის 15 წუთში ჩისკოს ექიმების დახმარება რამდენიმეჯერ დაჭირდა და საბოლოოდ, შეცვალეს კიდეც. მე-18 წუთზე გოჩა ტყებუჩავას გუნდმა პირველ ტაიმში ერთადერთი ხეირიანი შეტევა განახორციელა – ლევან კუტალიამ წამოწყებული კონტრშეტევა პარტნიორის პასის მერე თავად დაასრულა საჯარიმოს მისადგომებიდან ძლიერი, მაგრამ არაზუსტი დარტყმით. 24-ე წუთზე, მარჯვენა ფრთიდან კოტოს გადაცემას ალექსანდრე კოშკაძე გამოეხმაურა, რომელმაც კარის ახლოდან მახვილი კუთხიდან მიზანს თავით ააცილა. ამ ეპიზოდიდან 5 წუთში, გიორგი მერებაშვილმა ზუგდიდელთა კართან მარტო დატოვა კოტო, რომელმაც წინ გამოსულ სომხიშვილს ბურთი თავსზე გადაუგდო და ხარიხას მოარტყა, ხოლო დამატებაზე მყოფი კოშკაძის დარტყმულს ნიკა აფაქიძე გადაეღობა. 39-ე წუთზე, ჯაბა ჯიღაური უტევდა ახლო მანძილიდან და მეტოქის მცველის ფეხიდან ბურთი ოდიკაძეს მიუვიდა, რომლის დარტყმული ძალიან ხელსაყრელი პოზიციიდან უზუსტო აღმოჩნდა. მეორე ტაიმი მცირე ხნის განახლებული იყო, რომ ახლო მანძილიდან მერებაშვილის მიერ დარტყმული ბურთი სომხიშვილმა ხელებში ვერ შეიმაგრა და კოშკაძემ ვარდნაში ანგარიში გახსნა. 50-ე წუთზე ჯიღაურმა ერთი მოძრაობით ორი მცველი ჩამოიშორა და ცაციათი დაარტყა, მაგრამ სომხიშვილს პრობლემა არ შექმნია. 52-ე წუთზე გოგუა მარცხენა ფლანგზე ცრუ მოძრაობით გაცდა მეტოქეს და საჯარიმოში შესულმა ასისტენტობა კოტოს გაუწია, რომელმაც ზუგდიდელები მეორედ დაამწუხრა. 56-ე წუთზე გოგუა "ბაიას” საჯარიმოს ხაზთან აქუბარდიას მჭიდროდ ეთამაშა და ზუგდიდელი მცველის მეკარის მისამართით გაკეთებული პასი სახიფათო დარტყმად იქცა – სომხიშვილმა ბურთი ნახტომში კუთხურზე მოიგერია. ვინადიან "ბაიას” მეკარეს წესების მიხედვით ბურთთან ხელით შეხება არ შეეძლო, მსაჯმა მასპინძელთა კარის სიახლოვეს თავისუფალი დანიშნა. "სტანდარტულის” შესრულების შემდეგ, მეტოქის მცველიდან ბურთი გოგუას მიუვიდა, რომელმაც ჩააწოდა და ბურთი სტუმართა მცველს აშკარად ხელზე მოხვდა, თუმცა მსაჯმა პენალტი არ დანიშნა. 63-ე წუთზე "ბაიას” სხვაობის შემცირების შანსი ჰქონდა, მაგრამ თბილისელთა საჯარიმოს გარედან გიორგი გაბედავას ძალიან სახიფათოდ დარტყმული ბურთი გიორგი ლორიამ კუთხურზე მოიგერია. საპასუხო შეტევის შემდეგ, მერებაშვილმა ხელსაყრელი პოზიციიდან ბურთი კარს ააცილა. 69-ე წუთზე, მარჯვნიდან შეტევაში ჩართული აფაქიძე ორ მცველს გაცდა და საუცხოო პასი გაუკეთა ავთო ენდელაძეს, რომელმაც თავისი შანსი ხელიდან არ გაუშვა. "დინამოს” კიდევ ერთი გოლის გასატანად დიდი დრო არ დასჭირვებია. 74-ე წუთზე მერებაშვილის წამოწყებული კონტრეშეტევა გოგუამ გააგრძელა და საჯარიმოში შესულმა, გვერდი გიორგი პაჭკორიას აუარა, რომელმაც მასპინძელთა ნახევარმცველი წააქცია და არბიტრმა პენალტი დანიშნა. თერთმეტმეტრიანი ზუსტად მერებაშვილმა შეასრულა. 82-ე წუთზე გოგუამ მარცხენა ფლანგიდან მორიგი რეიდი განახორციელა და საჯარიმოში შესულმა, პასი პაპავას გაუკეთა, მაგრამ სომხიშვილმა ბურთს მიმართულება ფეხით შეუცვალა და ირაკლი ძარიამ "დინამოს” შეტევა გოლით მაინც დაასრულა. მატჩში წერტილი გოგუამ დასვა, რომელმაც საჯარიმო დარტყმა ზუსტად შეასრულა და ეროვნულ ჩემპიონატში დაბრუნების შემდეგ, პირველი გოლი მიითვალა. გოჩა ტყებუჩავა: "პირველყოვლისა, ვულოცავ გამარჯვებას გიორგის. აშკარად ცუდად ვითამაშეთ. "დინამომ” გვაჯობა. რომ გითხრათ, სამი წლის გუნდი ვართ ან ვიღაც ისეთი ფეხბურთელები გვყავს... თუმცა, ამით თავს არ ვიმართლებ. ორი თვის გუნდი ვართ... აგურს აგურზე დავდებთ და გუნდს დავალაგებთ. გიორგის წარმატებას ვუსურვებ”. გიორგი დევდარიანი: "3 ქულის აღება ნებისმიერ თამაშში სასიხარულოა. თუმცა, ეს "დინამოს” მოდუნებისა და თვითკმაყოფილების საფუძველს არ აძლევს. პირველ ტაიმში უამრავი საგოლე მომენტი გავაცუდეთ. მომენტების რეალიზაცია პრობლემად რჩება და აქტუალობას არ კარგავს. სიმართლე გითხრათ, ვიცოდი, რომ "ბაიას” მეორე ტაიმი გაუჭირდებოდა, რადგან ძალიან "მოკლე სკამი” აქვს. ბიჭებს ვუთხარი კიდეც, რომ თუ პირველ ტაიმში გატანა ვერ მოვახერხეთ, მეორეში აუცილებლად გავიტანთ-მეთქი. მადლობა ყველა ფეხბურთელს გაწეული სამუშაოსთვის”. - გიორგი მერებაშვილისა და გოგიტა გოგუას თამაშს როგორ შეაფასებთ? დევდარიანი: "მერებაშვილი ოპტიმალურ ფორმაში არ იმყოფება. მეც ვიცი და თავადაც იცის, რომ უფრო მეტი შეუძლია. მისგან მეტი გატანილი გოლი და აგრესია გვინდა. გოგუამ გამარჯვებაში დიდი წვლილი შეიტანა. მარცხენა ფრთიდან თამაშს ამწვავებდა. მას თამაშის საკუთარ თავზე აღება და კრიტიკულ მომენტში მატჩის ბედის შემოტრიალება შეუძლია. ოპტიმალური ფორმისგან ისიც შორსაა”. დინამო (თბილისი) – ბაია (ზუგდიდი) 5:1 (0:0) 26 თებერვალი. თბილისი. "ბორის პაიჭაძე”. დინამო: ლორია, ოდიკაძე, კვეკვესკირი, თომაშვილი, ტვილდიანი, კოშკაძე (პაპავა, 75), ძარია, გოგუა, კოტო (რობერტინიო, 54), მერებაშვილი, ჩისკო (ჯიღაური, 18). მთავარი მწვრთნელი: გიორგი დევდარიანი ბაია: სომხიშვილი, პაჭკორია, აკობია, ტყემალაძე, ქვარცხავა (აქუბარდია, 55), კუტალია, სიხარულია, კუკავა (ფარჯიკია, 77), აფაქიძე, ენდელაძე (ახვლედიანი, 81), გაბედავა. მთავარი მწვრთნელი: გოჩა ტყებუჩავა გოლები: 1:0 კოშკაძე (46), 2:0 კოტო (52), 2:1 ენდელაძე (69), 3:1 მერებაშვილი (75, პენ.), 4:1 ძარია (82), 5:1 გოგუა (90+1). გაფრთხილება: ქვარცხავა (20), სიხარულია (36), აკობია (67), ოდიკაძე (83), ლორია (88). მთავარი მსაჯი: დავით ხარიტონაშვილი

1 2 3 4 5 Category: სიახლეები | Views: 1097 | Added by: John_Cena | Rating: 0.0/0

Total comments: 1
Comments display order: By default New comments first Old comments first სრულად ნანახია: | ავტორი:John_Cena | Дата: კვირა | კომენტარები ()