ვნებები ცოტათი ჩაცხრა, გუნდები სატურნირო ცხრილში დალაგდნენ და ყველამ მისი ადგილი იპოვა - უმეტესობამ დამსახურებული. ფედერაციის საშეჯიბრო განყოფილებაში ჩემპიონატის მორიგი ეტაპის კალენდარზე მუშაობენ. ჩვენი ინფორმაციით, გუნდებს შესვენების საშუალება აღარ ექნება - საიმისოდ, რომ მაისის ბოლომდე 14 ტურის გამართვა მოესწროს, პლეი ოფიც და პლეი აუტიც 3-4 დღეში უნდა დაიწყოს.

ვიტ ჯორჯია - ზესტაფონი

XXII ტურში განვითარებული მოვლენების შედეგად, თბილისის "ვიტ ჯორჯია” ეროვნული ჩემპიონატის უძლიერეს 8 გუნდს შორის ვერ მოხვდა. საქართველოს ორგზის ჩემპიონს ბრძოლა ლიგაში შენარჩუნებისთვის მოუწევს, რაც მხოლოდ გათამაშების რეგლამენტის ბრალი ნამდვილად არაა. გუნდის მთავარმა მწვრთნელმა ზურაბ ბერიძემ თამაშის შემდეგ აღნიშნა კიდეც - ჩვენი ბრალია, საქმე აქამდე რომ მივიყვანეთო.
"ზესტაფონს” ხუთი ფეხბურთელი აკლდა – ჯაბა დვალს მენისკის პრობლემები აქვს და ექიმებმა ხელოვნურსაფარიან მოედანზე თამაში აუკრძალეს, თემურ ღონღაძეს კოჭი აწუხებდა, თორნიკე აფციაურს ფეხის თითი აქვს მოტეხილი, ხოლო შოთა გრიგალაშვილს გრიპის ვირუსი შეეყარა. ამის მიუხედავად, სტუმრებს გამარჯვება არ გასჭირვებიათ და დამამთავრებელ ფაზაში უფრო ზუსტნი რომ ყოფილიყვნენ, განსაკუთრებით მეორე ტაიმში, ანგარიში გაცილებით სოლიდური იქნება. თუმცა, საბოლოო ჯამში, ამ მოგებამ გიორგი ჭიაბრიშვილის შეგირდებს პრაქტიკული თვალსაზრისით ვერაფერი შესძინა, რადგან "ვიტ ჯორჯიასთან” მოპოვებული ქულები გუნდს მეორე ეტაპზე არ გადაჰყვება.
შეხვედრის მე-17 წუთზე თორნიკე გორგიაშვილის მეტოქის საჯარიმოში ჩაწოდების შემდეგ, მეტოქის მცველიდან ბურთი ლევან შარიქაძეს მიუვიდა, რომლის ახლო მანძილიდან დარტყმულს გიორგი ვასაძე გადაეფარა. სამ წუთში, მარჯვენა ფრთაზე მყოფმა გურამ გურეშიძემ ზესტაფონელთა კარის წინ მყოფი ლევან კუხალეიშვილი მოძებნა, რომელიც ნახტომში ბურთს კი მიწვდა, მაგრამ კარში ვერ გადაგზავნა. 29-ე წუთზე, გორგიაშვილის წამოწყებული შეტევის შემდეგ, რატი წინამძღვრიშვილი თბილისელთა საჯარიმშო ერთ მეტოქეს გაცდა, მაგრამ კარში დარტყმის ნაცვლად არაზუსტი პასი გაუკეთა იმავე გორგიაშვილს და მწვავე შეტევა ჩაიშალა.
33-ე წუთზე, დავით მუჯირის კარგი გადაცემის მერე, მასპინძელთა დაცვა "ჩავარდა”, ხოლო საჯარიმოს ფარგლებს გაცდენილმა გიორგი ძაძამიამ მასთან პირისპირ დარჩენილი დავით რაჟამაშვილი წააქცია – მსაჯმა ბოლო იმედის ჯარიმისთვის "ვეტერინართა” მეკარე გააძევა. ამ ეპიზოდში როინ კვასხვაძე, რომელმაც ლამის მთელი მინდორი გადაკვეთა, მთავარ მსაჯს ეკამათა და ყვითელი ბარათიც მიიღო.  საჯარიმო დარტყმა მუჯირმა არაზუსტად შეასრულა. 42-ე წუთზე, "სტანდარტულის” შემდეგ, გურამ ადამაძემ მკერდით ბურთი ლაშა კასრაძეს დაუგდო, რომელმაც ხელსაყრელი პოზიციიდან არაზუსტად დაარტყა.
მეორე ტაიმი ერთი წუთის განახლებული იყო, რომ მუჯირმა მკერდით პასი წინამძღვრიშვილს გაუკეთა, რომელიც "მარჯვენამ” დააღალატა, თორემ შესაძლოა ანგარიშიც გაეხსნა. ამ ეპიზოდიდან ერთ წუთში, რაჟამაშვილი დარჩა ჯინო რეჭიასთან მარტო, მაგრამ მასპინძელთა მეკარეს ვერ აჯობა. მალევე, მარცხენა ფლანგიდან ზაალ ელიავას პასის მერე, რაჟამაშვილმა დაახლოებით პენალტის ნიშნულიდან ააცილა.
58-ე წუთზე, მარცხენა ფრთიდან ვასაძემ ასისტენტობა კუხალეიშვილს გაუწია, რომელმაც თავით ნახტომში ძალიან სახიფათოდ დაარტყა და "ზესტაფონი” გაშვებული გოლისგან კვასხვაძემ იხსნა. 77-ე წუთზე, მუჯირმა "ვიტ ჯორჯიას” მეკარეს გორგიაშვილი შეატოვა, რომელმაც საკუთარი შანსი ხელიდან არ გაუშვა. "ზესტაფონს” ანგარიშის გაზრდაც შეეძლო, თუმცა გორგიაშვილის პასის შემდეგ რეჭიასთან ერთ-ერთზე გასულ გურამ სამუშიას თბილისელთა მეკარემ აუღო. არბიტრის მიერ დამატებულ წუთებში საბა ლომია მოწინააღმდეგის მცველთან ორთაბრძოლისას "ვეტერინართა” საჯარიმოში წაიქცა, მაგრამ პენალტის დანიშვნის ნაცვლად ლევან კვარაცხელიამ იმერელთა ფორვარდს ყვითელი ბარათი აჩვენა.
გიორგი ჭიაბრიშვილი: "თამაშის ხარისხით უკმაყოფილო ვარ. გამორჩეულად ცუდი თამაში ჩავატარეთ. ხელი იმ ფაქტმა შეგვიშალა, რომ ბევრი ტრავმირებული ფეხბურთელი გვყავს და ხელოვნურ საფარზე თამაში ცოტა გვიჭირს. მართალია, მოპოვებული ქულები არ გადაგვყვება, მაგრამ ჩვენთვის მთავარი სპორტული პრინციპია. გუნდში შევთანხმდით, ქულები არ დაგვეთვალა და ყველა თამაში უნდა მოგვეგო, რათა დაგვემტკიცებინა, რომ ღირსეული ჩემპიონები ვართ”.
ზურაბ ბერიძე: "ჩვენი ბრალია, რომ საქმე აქამდე მივიყვანეთ. ადრე უნდა გადაგვწყვიტა 8 გუნდში მოხვედრის საკითხი. საწყენია, რომ ასე მოხდა, მაგრამ კიდევ ვიბრძოლებთ”.
ვიტ ჯორჯია (თბილისი) – ზესტაფონი 0:1 (0:0)
8 მარტი. მცხეთა. "მცხეთა პარკი”.
ვიტ ჯორჯია: ძაძამია, დავით ხურცილავა, ადამაძე (გოგიაშვილი, 51), კასრაძე, ღანიაშვილი, გურამ გურეშიძე, კუხალეიშვილი (ვაშაკიძე, 83), ზაქრაძე (რეჭია, 35), კორიფაძე, ჯანელიძე (კ), ვასაძე.
მთავარი მწვრთნელი: ზურაბ ბერიძე
ზესტაფონი : როინ კვასხვაძე, თორნიკე გრიგალაშვილი, გიორგი ონიანი (კ), კობახიძე, ელიავა, მენთეშაშვილი (ბერაია, 78), გორგიაშვილი, შარიქაძე, რაჟამაშვილი (გურამ სამუშია, 58), მუჯირი, წინამძღვრიშვილი.
მთავარი მწვრთნელი: გიორგი ჭიაბრიშვილი
გოლი : 0:1 გორგიაშვილი (77)
გაფრთხილება : ღანიაშვილი (26), შარიქაძე (27), კვასხვაძე (34), საბა ლომია (90+1)
გაძევება : ძაძამია (34)
მთავარი მსაჯი: ლევან კვარაცხელია

სპარტაკი - დილა

როვნული ჩემპიონატის რეგულარული ეტაპის დასკვნითი ტურის მატჩში, "მიხეილ მესხის” სახელობის არენამ შიდაქართლურ დაპირისპირებას უმასპინძლა. მატჩამდე, ცხინვალის "სპარტაკსაც” და გორის "დილასაც” პირველ რვა გუნდში მოსახვედრად მხოლოდ გამარჯვება სჭირდებოდათ, მაგრამ როგორც შემდეგ გაირკვა, თემურ მახარაძის გუნდმა მიზანს ფრითაც მიაღწია.
შეხვედრის პირველივე წუთებიდან, ორივე გუნდს ეტყობოდა, რომ მხოლოდ გამარჯვებაზე ფიქრობდა. დასკვნითი ტური იყო და, შესაბამისად, ძალების დაზოგვაზე არავინ ფიქრობდა, რაც თამაშზეც სასიკეთოდ აისახა. მეტოქის კარისაკენ პირველი დარტყმა მასპინძლის რანგში მოთამაშე ცხინვალელებმა შეასრულეს – კონსტანტინე გაბაშვილმა შორი მანძილიდან გაისროლა, მაგრამ არაზუსტად.
საპასუხოდ, გორელებმაც შეუტიეს. თბილისის "დინამოს” ყოფილმა ფეხბურთელმა, გიორგი კახელიშვილმა ერთი მეტოქე ჩამოიშორა და მეკარისაგან შორეულ კუთხეში დაარტყა, მაგრამ მანაც ააცილა.
მე-12 წუთზე, "სპარტაკის” გააზრებული შეტევა გოლით დასრულდა – რამდენიმესვლიანი კომბინაციის შედეგად, ბურთი ლაშა ჩაფიძეს მეტოქის საჯარიმოში მიუვიდა და ზუსტი დარტყმის შესრულება არ გასჭირვებია – 1:0. ამ თითქოს მოულოდნელმა გოლმა, სტუმრები გამოაცოცხლა. წონასწორობის აღდგენა შეეძლო გიორგი ილურიძეს, მაგრამ მისი თავური კარს მცირე მანძილით აცდა. თავით ცდილობდა მასპინძელთა კარის დალაშქვრას ირაკლი ლექვთაძეც, მაგრამ ამჯერად, მეკარემ იყოჩაჟა.
ტაიმის დასრულებამდე ათიოდე წუთით ადრე, "სპარტაკმა” უპირატესობა ორ ბურთამდე გაზარდა – მეკარე მარინ სკენდერის უხეიროდ მოგერიებულ ბურთს ჩაფიძემ დაამატა და დუბლიც გაიფორმა.
რა თქმა უნდა, შეხვედრის მეორე ნახევარში "დილა” მხოლოდ შეტევაზე ფიქრობდა. როგორც გუნდის თავკაცმა თემურ მახარაძემ მატჩისშემდგომ პრესკონფერენციაზე განაცხადა, რომ ფეხბურთელებს შეტევაში დიდი ძალებით გადასვლა მოსთხოვა, რამაც, საბოლოოდ, შედეგი ნამდვილად მოიტანა.
ანგარიშში სხვაობის შემცირება გიორგი ილურიძესა და რევაზ ჯიქიას შეეძლოთ, მაგრამ პირველ მათგანს მეკარემ აჯობა, მეორეს – მცველებმა შეუშალეს ხელი და მომენტებიც განიავდა.
82-ე წუთზე, ჯიქიამ მიზანს მაინც მიაღწია – საჯარიმოს ხაზიდან უძლიერესი დარტყმა შეასრულა და ბურთი "ცხრიანში” მოათავსა. საერთოდაც, მეორე ტაიმმა, როგორც თითქმის მთელმა მატჩმა, გორელთა უპირატესობით ჩაიარა. მახარაძის იმედმოცემულმა გაწვრთნილებმა მატჩის დასკვნით წუთებში მეტოქეზე ზეწოლა გააძლიერეს საუკეთესო 8 გუნდშიც შეინარჩუნეს ადგილი – ანგარიშის გამათანაბრებელი გოლი გიორგი ილურიძემ გაიტანა, რომელმაც სტუმართა ჩაწოდებული კუთხურის შემდეგ შექმნილი არეულობით ისარგებლა, ზუსტი თავური დარტყმა შეასრულა და "სპარტაკი” სატურნირო ცხრილში მე-10 პოზიციაზე "გადაიყვანა” – 2:2.
თემურ მახარაძე ("დილა”): "მნიშვნელოვანი და დაძაბული თამაში იყო. მეტოქემ კარგად იასპარეზა, განსაკუთრებით, პირველ ტაიმში. სამწუხაროდ, ჩვენ ბევრი საგოლე მომენტი გავანიავეთ. შეხვედრის მეორე ნახევარში, დასაკარგი აღარაფერი გვქონდა და შეტევა გავაძლიერეთ. მინდა მადლობა გადავუხადო ფეხბურთელებსა და გულშემატკივრებს”.
ვლადიმერ ხაჩიძე ("სპარტაკი”): უპირველესად, ვულოცავ "დილას” პირველ რვა გუნდში მოხვედრას. პირველი ტაიმი კარგად ჩავატარეთ, მეორეში – ძალა და გამოცდილება აღარ გვეყო. რას ვიზამთ, ცხოვრება გრძელდება. ყველაფერს გავაკეთებთ იმისთვის, რომ უმაღლეს ლიგაში დავრჩეთ.

"სპარტაკი” (ცხინვალი) – "დილა” (გორი) 2:2 (2:0)
8 მარტი. თბილისი. "მიხეილ მესხი”.
სპარტაკი: ნადირაძე, ჭაფოძე, ლომაია, ტეტუნაშვილი, მაისურაძე, შარაშენიძე (ჯიშკარიანი 65), შონია, ჩივაძე (გურეშიძე 86), ჩაფიძე, გაბაშვილი, მელქაძე (გელაშვილი 60).
მწვრთნელი : ვლადიმერ ხაჩიძე
დილა : სკენდერი, ალადაშვილი, სალუქვაძე, თოთაძე (მეგრელიშვილი 75), ინწკირველი, ლექვთაძე (ვაწაძე 46), ილურიძე, კახელიშვილი, არზიანი, კაშია (გურული 38), ჯიქია.
მწვრთნელი : თემურ მახარაძე
გოლები : 1:0 ჩაფიძე (12), 2:0 ჩაფიძე (34), 2:1 ჯიქია (82), 2:2 ილურიძე (88)
გაფრთხილებები : ტეტუნაშვილი (75), ალადაშვილი (75), ილურიძე (90)
მთავარი არბიტრი: მალხაზ ბეუქლიშვილი

გაგრა - დინამო

გიორგი დევდარიანმა მეოთხე მატჩში უხელმძღვანელა "დინამოს” და მეოთხედ მოიგო. ახალგარზდა ქართველი სპეციალისტის ხელში, დინამოელებს ჯერ ქულაც არ დაუკარგავთ და სხვათა შორის, ორ შემთხვევაში გუნდმა ბოლო წუთზე გატანილი გოლით მოიგო: "სიონთან” ირაკლი ძარიამ შეაგდო, "გაგრასთან” კი - გიორგი მერებაშვილმა. "დინამოს” 10 ნომერმა ამ 4 ტურში 4 გოლი მოაგროვა, აქედან, 2 პენალტით.
მსაჯის მიერ დამატებული პირველი წუთი მიმდინარეობდა, როცა "გაგრას” საჯარიმოს მისადგომებთან არეულობა შეიქმნა, მერებაშვილმა ამით ისარგებლა, ორ მცველს გასცდა და მეკარეს შორეულ კუთხეში გაუტანა. მშვენიერი ინდივიდუალური გოლი გამოვიდა და პლუს, მომგებიანი.
არადა, "გაგრამ” ძალიან კარგი შთაბეჭდილება დატოვა და მართლაც არ იმსახურებდა წაგებას. მართალია, უპირატესობას დევდარიანის გუნდი ფლობდა, მაგრამ 90 წუთის განმავლობაში დინამოელთა მეკარე კოკა სეფიაშვილს უფრო რთული ბურთების მოგერიება მოუხდა, ვიდრე მის კოლეგა გიორგი ბეგაშვილს. თავად განსაჯეთ, სანამ მერებაშვილი გადამწყვეტ გოლს გაიტანდა, "გაგრას” ხუთწუთიან მონაკვეთში (82-ედან 84-ე წუთამდე) ორჯერ შეეძლო დაწინაურება.
ეს მომენტები კი კონტრშეტევებისას უფრო იქმნებოდა და აშკარად ჩანდა, "დინამოს” უკანახაზელები სისწრაფეში ჩამორჩებოდნენ მეტოქის ფეხბურთელებს. "გაგრა” დიდი ძალებით იცავდა თავს და დიდი ძალებითვე გადადიოდა წინ.
თანმიმდევრულად: პირველი მეტ-ნაკლებად სახიფათო შეტევა "დინამომ” განახორციელა და ტრავმის შემდეგ პირველად მოთამაშე გიორგი რეხვიაშვილმა გარედან მოარტყა ბურთი ბადეს. 30-ე წუთზე კი ანგარიშიც გაიხსნა: ალექსანდრე კოშკაძემ საჯარიმოში მოატყუა ირაკლი ხუციძე, უფრო სწორად, ატყუებდა და მცველმა ოდნავ დაქაჩა. პენალტი დაინიშნა და მერებაშვილმა ზუსტად დაარტყა – 1:0.
"გაგრას” ერთ წუთში შეეძლო გათანაბრება, თუმცა სეფიაშვილმა გიორგი ყურულაშვილის ურთულესი თავური დარტყმა მოიგერია. ამის შემდეგ მიკელ ალვაროსა და მერებაშვილს გაუცუდდათ შანსები. კარგი მომენტი იყო, როცა "მერებამ” საჯარიმოში მოკლე მონაკვეთზე მოატყუა ერთი მცველი, არჩილ ტვილდიანს გაუთამაშა და ბოლოს თავად დაარტყა – უზუსტოდ.
და "გაგრამ” ტაიმის ბოლო წუთზე გაათანაბრა: ნიგერიელი ჯონ ჯერემია მოულოდნელად დარჩა მეკარესთან პირისპირ და 1:1. ეს ჯერემიას მესამე გოლია სეზონში – სწრაფი და ტექნიკური ფორვარდია, თუმცა საჯარიმოში თითქოს აგვიანებს გადაწყვეტილების მიღებას.
დევდარიანმა მეორე ტაიმი შეცვლებით დაიწყო, კერძოდ, ჩისკო და გოგიტა გოგუა ჩართო თამაშში. ესპანელი სულ წინ დააყენა, მერებაშვილი კი – ნახევარდაცვაში დასწია. დაახლოებით 20-25 წუთი არაფერი მომხდარა საინტერესო და თამაში "გაგრას” ნახევარმცველ ნიკა ჭკუასელის შორეულმა დარტყმამ გამოაფხიზლა: ბურთი ხარიხას მოხვდა. მალევე, გოგუა ორჯერ მოხვდა ყურადღების ცენტრში, კერძოდ, ჩისკოს ჭკვიანურად გააყოლა ბურთი ფლანგზე, ექსვალენსიელმა საჯარიმოში გააკეთა პასი და მერებაშვილმა ძალიან სუსტად დაარტყა. შემდეგ კი გოგუამ თავისივე დაწყებული კომბინაციის შემდეგ ააცილა.
"დინამო” ბევრს ცდილობდა, თუმცა "გაგრამაც” მოუმატა და ზედიზედ შექმნა სახიფათო მომენტები: სეფიაშვილმა ურთულესი ბურთი მოხსნა "ცხრიანიდან”, კერძოდ, ნიკა ჯიშკარიანს არ გაატანინა. ორ წუთში ჯიშკარიან-სეფიაშვილის მეორე დუელიც მეკარის კარგი ნახტომით დასრულდა.
ბოლოს კი იყო მერებაშვილის მართლაც ლამაზი გოლი, რომელმაც "დინამოს” ზედა "რვეულისთვის” ქულები ვერ შესძინა, მაგრამ ზედიზედ მეოთხე მოგება გუნდის ფსიქოლოგიიისთვის იყო კარგი. "გაგრას” კი თავის უშუალო კონკურენტებთანაც რომ ასე ეთამაშა, რვა გუნდს მიღმა ნამდვილად არ დარჩებოდა...  
  მატჩის შემდეგ
ზვიად ჯელაძე: "უპირველესად, "დინამოს” ვულოცავ მოგებას. საინტერესო და დრამატული თამაში გამოდგა. წაგება არასასიამოვნოა, თუმცა ფეხბურთელებით კმაყოფილი ვარ. ჩვენმა ახალგაზრდა ბიჭებმა დიდი ბრძოლა უნდა გამოიარონ უმაღლეს ლიგაში დასარჩენად და იმედიანად ვარ განწყობილი”.
გიორგი დევდარიანი: "მეტოქის კარგ თამაშს გამოვარჩევ. "გაგრა” პროგრესირებადი გუნდია და მართლაც დიდი წინააღმდეგობა გაგვიწია.  როგორც იცით, ამ შეხვედრას არანაირი სატურნირო დატვირთვა არ ჰქონდა, ამიტომაც, მოსამზადებელი კუთხითაც გამოვიყენეთ. რეხვიაშვილმა სამთვიანი შესვენების შემდეგ პირველად ითამაშა და მაინტერესებდა, რამდენად გაართმევდა თავს დატვირთვებს. რა თქმა უნდა, გიორგი იდეალური ფორმისგან ჯერ  შორსაა. ჩისკო და გოგუა მეორე ტაიმისთვის შემოვინახეთ, ასევე, გერაუ ვნახეთ საქმეში. იყო პრობლემები, მაგალითად, შეტევიდან დაცვაში სწრაფ გადაწყობაში, ასევე, დამამთავრებელ ფაზაში. კარგია, რომ ამ პრობლემების დანახვის საშუალება მომეცა”.   
8 მარტი. 15:00. თბილისი. "ბორის პაიჭაძე”
"გაგრა”-"დინამო” (თბილისი) 1:2 (1:1)
გაგრა: ბეგაშვილი, ხუციძე, ტყეშელაშვილი, კალანდაძე, ჯგერენაია, ყურულაშვილი, ჭკუასელი, ხოჯაშვილი (კვანტალიანი 35), ნიკა ჯიშკარიანი, სარდალიშვილი (ყიფიანი 80), ჯერემია.
მწვრთნელი : ზვიად ჯელაძე.
დინამო : სეფიაშვილი, ტვილდიანი, კვეკვესკირი, გიორგი რეხვიაშვილი (თომაშვილი 56), ხმალაძე, გერაუ (გოგუა 46), ძარია, კოშკაძე (ჩისკო 46), კოტო, მერებაშვილი.
მწვრთნელი : გიორგი დევდარიანი.
გოლები : 0:1 მერებაშვილი (30), 1:1 ჯერემია (45), 1:2 მერებაშვილი (90+1).
გაფრთხილება : ხუციძე (30), ჩისკო (73), ყურულაშვილი (88), გოგუა (88).
არბიტრი : არსენ ნონიკაშვილი.

მეტალურგი - სიონი

რუსთაველებმა წინა ტურის მსგავსად წააგეს, მაგრამ იმ განსხვავებით, რომ ამჟამად დაკარგული ქულები მათ სატურნირო პასივში არ იწერება. ძნელია იმის მტკიცება, "მეტალურგმა” თანარეგიონელ აუტსაიდერთან შედეგზე თამაში არ მოინდომაო. გათამაშების სისტემაა ისეთი, მეტოქეები მოვალეობის მოხდის მიზნით გავიდნენ სტადიონზე და ითამაშეს. ჰოდა, როგორიც სისტემაა, თამაშიც ისეთი იყო.
ანგარიში ირაკლი სიხარულიძემ მასპინძელთა სასარგებლოდ მე-10 წუთზე გახსნა. "უფროსი” რეგიონელის გოლს ვილი ისიანმა მე-40 წუთზე უპასუხა, ხოლო სამიოდე წუთში ჯაბა უგულავამ სულაც დააწინაურა "სიონი”. მე-2 ტაიმში კობა ჟორჟიკაშვილის მიერ განხორციელებული შეცვლებით თუ ვიმსჯელებთ, "მეტალურგი” გათანაბრებას შეეცადა, მაგრამ უშედეგოდ. 2:1, საბოლოოდ ასეთი ანგარიშით მოიგეს ბოლნისელებმა.
ერთი შეხედვით მშვიდ, რეგიონულ დერბიში, მატჩის 86-ე წუთზე მცირე ინციდენტი მაინც მოხდა. არბიტრმა ირაკლი ურუშაძემ შეცვლაზე შემოსული ბოლნისელი ზვიად მეტრეველი გააფრთხილა, რამაც "სიონის” თავკაცის ხვიჩა ქასრაშვილის სიტყვიერი პროტესტი გამოიწვია. საქმე ის გახლავთ, რომ მეტრეველისთვის ეს გაფრთხილება რიგით მე-3 გახლავთ (ერთხელ ცხინვალის "სპარტაკში” ასპარეზობისას "გააყვითლეს”) და მას პლეი აუტის პირველივე მატჩის გამოტოვება უწევს. სწორედ ამან აღაშფოთა ქასრაშვილი და არბიტრისაგან წითელი ბარათიც იმიტომ დაიმსახურა.
”მეტალურგი” (რუსთავი) - ”სიონი” (ბოლნისი) 1:2 (1:0)
8 მარტი. რუსთავი, ”ფოლადი”.
”მეტალურგი”: ბედიაშვილი, გეწაძე, სიხარულიძე, თექთურმანიძე (ტატანაშვილი, 65), სევასტი თოდუა, ირაკლი მაისურაძე (ირაკლი მოდებაძე, 79), მახვილაძე, რაზმაძე, გივი კვარაცხელია, ქავთარაძე, გიორგი სეთურიძე (გიორგი ჭედია, 74).
მთავარი მწვრთნელი: კობა ჟორჟიკაშვილი.
”სიონი”: ლობჟანიძე, ავსაჯანიშვილი, გიორგი ოქროპირიძე, ქემოკლიძე, ჩიკვილაძე, ნემსაძე, ისიანი, ჭანკოტაძე (ოლეგ გველესიანი, 46), დავით ბოლქვაძე, უგულავა (გიორგი მერაბის ძე ხიდეშელი, 46), ზურაბ ხურციძე (მეტრეველი, 79).
მთავარი მწვრთნელი: ხვიჩა ქასრაშვილი.
გოლები : 1:0 სიხარულიძე (10), 1:1 ისიანი (40), 1:2 უგულავა (43).  
გაფრთხილებები : ხურციძე (45), მახვილაძე (55), მეტრეველი (86).
გაძევება : ქასრაშვილი (86).
მსაჯები : ი. ურუშაძე; ი. უკლება, დ. კურტანიძე; თ. გვანცელაძე.

ბაია - მერანი

მატჩის საბოლოო შედეგი 83-ე წუთზე დაფიქსირდა, როცა არბიტრმა გიორგი ვადაჭკორიამ სტუმართა კარის მიმართულებით 11-მეტრიანი დარტყმა დანიშნა. ბურთთან დასარტყმელად შოთა ლომია მივიდა და მის გუნდს 3 ქულა მოუტანა - 1:0.
ეს იყო პირველი მოგება, რომელიც ”ბაიამ” გოჩა ტყებუჩავას თავკაცობით ოფიციალურ მატჩში იზეიმა. მანამდე ზუგდიდელებმა 3 მატჩი გამართეს და გორის ”დილასთან” ერთადერთი ფრის (0:0) შემდეგ, ”ზესტაფონთან” (0:1) და ”დინამოსთან” (1:5) წააგეს.
”ბაია” (ზუგდიდი) - ”მერანი” (მარტვილი) 1:0 (0:0)
8 მარტი. ზუგდიდი, ”ბაიას” საწვრთნელი ბაზის ხელოვნურსაფარიანი მოედანი.
"ბაია”: სომხიშვილი, პაჭკორია, ტყემალაძე, კუტალია, სიხარულია (ნიკა შონია, 86), ენდელაძე (ეხვაია, 67), შოთა ლომია, აფაქიძე, გაბედავა, ლევან ტყებუჩავა, ლევან აკობია (გიორგი ქვარცხავა, 71).
მთავარი მწვრთნელი: გოჩა ტყებუჩავა.
"მერანი”: შეროზია, იობაშვილი, კიკალიშვილი, მელიავა, გეგეჭკორი, სუხიაშვილი, დიდავა, ჩალაძე (კაკულია, 85), ფონიავა, ამბროლაძე (ტაპე, 85), ბოხუა (ტორონჯაძე, 68).
მთავარი მწვრთნელი : მალხაზ ჟვანია.
გოლი : ლომია (83, პენ.).
გაფრთხილებები : ბოხუა (65), გეგეჭკორი (77).
მსაჯები : გ. ვადაჭკორია; ლ. მიქელაძე, დ. კვეტენაძე; ჯ. ხორავა.

XXII ტური
8 მარტი
კოლხეთი - ტორპედო 0:0
ვიტ ჯორჯია - ზესტაფონი 0:1 (0:0)
სპარტაკი - დილა 2:2 (2:0)
გაგრა - დინამო 1:2 (1:1)
ბაია - მერანი 1:0 (0:0)
მეტალურგი - სიონი 1:2 (1:2)
 

შენიშვნები
•    სფფ-ს რეგლამენტით, თანაბარი ქულების დაგროვების შემთხვევაში, ადგილები გაირკვევა შემდეგი პრიორიტეტული თანმიმდევრობით: 1. მოგებათა მეტი რაოდენობა; 2. უშუალოდ ერთმანეთში შეხვედრების შედეგები (ქულათა რაოდენობა, ბურთების სხვაობა); 3. ჩემპიონატში გატანილი და მიღებული ბურთების სხვაობა; 4. გატანილი გოლების რაოდენობა; 5. სტუმრად გატანილი გოლების რაოდენობა; 6. ფეირ ფლეის პრინციპი; 7. კენჭისყრა.
•    2 წრის შემდეგ, I-VIII ადგილზე გასული გუნდები, ურთიერთშეხვედრებში დაგროვილი ქულებით და გატანილ-გაშვებული ბურთებით, ორ წრედ იბრძოლებენ ჩემპიონის ტიტულისა და უეფას ევროპის ლიგის საგზურებისთვის. ბოლო 4 გუნდი კი, პირველი ლიგის ზონებში დაწინაურებულ ორ-ორ გუნდთან ერთად (8 გუნდი ორ წრედ ნულიდან), გაითამაშებენ უმაღლესი ლიგის ოთხ საგზურს.

სატურნირო ცხრილი II ეტაპისთვის გუნდების მიმდინარე მდგომარეობის გათვალისწინებით