21 წლის ზამბიელმა ფეხბურთელმა ჩისამბა ლუნგუმ რამდენიმე დღის წინ სასწაულ წარმატებას მიაღწია, კერძოდ, აფრიკის ერთა თასი მოიგო. ზუგდიდის "ბაიაში” ნათამაშებმა ლუნგუმ თასზე ყველა შეხვედრაში ითამაშა და კოტ დ’ივუართან ფინალში პენალტიც გაიტანა. იყო შანსი, "ჩისას” (ასე ეძახიან) საქართველოს სახელით თამაშა. აკი, ამხანაგურში ჩაუცვამს "ჯვაროსანთა” ფორმა - 2010 წლის იანვარში, როცა ოთარ გაბელიას 21-წლამდელთა ნაკრები ანთალიაში გადიოდა შეკრებას. არაოფიციალური ამხანაგური მატჩი იყო, ამიტომაც, "ჩათვლის წიგნაკში” არ შევიდა. ისე, ოფიციალურშიც რომ ეთამაშა, პრობლემა არ ექნებოდა – მთავარი ხომ ძირითად ნაკრებში გამოსვლაა.
ლუნგუთი ვერც ზუგდიდის "ბაიამ” მოითბო ხელი, არადა, ასეთ ფეხბურთელს დღეს სხვა ფასი ექნებოდა და ალბათ, მისი ახლანდელი კლუბის, რუსული "ურალის” ხელმძღვანელობა სიამოვნებისგან ხელებს იფშვნეტს – ზამბიელს ჩალის ფასად ნამდვილად არ გაყიდიან. სხვა მომენტია, მოხვდებოდა კი აფრიკის ერთა თასზე, კვლავაც "ბაიაში” რომ ეთამაშა?
რუსული "სოვეტსკი სპორტი” ლუნგუსა და მის აგენტს, დავიდ აბრამიანს ესაუბრა.
ლუნგუ ზამბიურ ცეკვაზე: "ჯადოქრობასთან არავითარი კავშირი არ გვაქვს. მაგალითად, ნახევრად მოხრილი ხელებით აქეთ-იქით რომ მოძრაობას ვაკეთებთ, ამ ცეკვას "დონტ შიკუეივა” ჰქვია. ცეკვის შინაარსი ასეთია: რამის გაკეთება თუ გსურს, სანამ არ შეასრულებ, ხმამაღლა არ უნდა ილაპარაკო”.
ანუ, დაახლოებით ასე: "სანამ არ გადახტები, "ჰოპლა” არ უნდა დაიძახო”.
"არცერთი რუსული ცეკვა არ ვიცი. მზად ვარ, "ურალის” ფეხბურთელებს შევასწავლო ზამბიური. რა თქმა უნდა, თუ მათ უნდათ. რუსეთის ჩემპიონატში ზამბიური ცეკვა კარგი სანახავი იქნებოდა”.
აი, რას ჰყვება დავიდ აბრამიანი: "ჩემს სააგენტოს აფრიკაში ჰყავს სკაუტები. მათ რამდენიმე ფეხბურთელს გაუწიეს რეკომენდაცია და მათ სორის, ლუნგუსაც. 2008 წელს ჩისამბა მოსკოვში ჩამოვიყვანეთ ტურნირზე. მომეწონა და ერევნის "პიუნიკში” გვსურდა მისი ჩარიცხვა, მაგრამ სომეხმა ექიმებმა სამედიცინო შემოწმებისას დაადგინეს, ფეხბურთელს გულის პრობლემები აქვსო. "დაადგინეს” ხმამაღალი ნათქვამია, რადგან ოფიციალური დასკვნა არ მოუციათ. ამის შემდეგ ლუნგუს რუსეთშიც ჩაუტარეს გამოკვლევა და ვერაფერი აღნმოუჩინეს”.
საქართველოში გატარებულ პერიოდზე...
"ჩისამბა ზუგდიდის "ბაიაში” გავაგზავნეთ. ეს კლუბი საქართველოს ჩემპიონატის უმაღლეს ლიგაში ახალი გადასული იყო, სულ ადგილობრივი მოთამაშეები ჰყავდა. ლუნგუ ზუგდიდში ერთადერთი შავკანიანი მაცხოვრებელი გახლდათ. "ბაიას” საფეხბურთო სკოლის ბავშვებს ჩისამბა ძალიან უყვარდათ და ადგილობრივი მაცხოვრებლებიც სიმპათიით უყურებდნენ”.
აბრამიანის თქმით, ჩისამბა გულღია ადამიანია და იოლად ამყარებს უცხო ხალხთან კონტაქტს. ამასთან, ძალიან მორწმუნე ყოფილა.
"როცა "ურალში” გადასვლის შანსი გაჩნდა, ჩისამბა მაშინვე დათანხმდა. გულშემატკივრებმა თბილად მიიღეს, თუმცა ექსცესები მაინც მოხდა. "ურალი” ორენბურგში თამაშობდა და იქაურმა გულშემატკივრებმა საშინელი სიტყვებით შეურაცხყვეს. ჩისამბა ყველაფერს მშვიდად შეხვდა, რადგან წინასწარ გააფრთხილეს, რომ მსგავსი რამ მოსალოდნელი იყო. ანუ, რობერტო კარლოსივით არ მოქცეულა, მშვიდად გავიდა მოედნიდან”, – ამბობს აბრამიანი და იქვე ამატებს, რომ ლუნგუს მიმართ ინტერესი ძალიან დიდია, თავად ფეხბურთელს კი მზიან ესპანეთში სურს კარიერის გაგრძელება.
ბოლოს ისევ ლუნგუს მოვუსმინოთ: "ზამბიაში რონალდინიოს მეძახდნენ. მშვენიერი მეტსახელია, თუმცა "რეალის” ქომაგი ვარ და "სამეფო კლუბში” გადასვლას ვისურვებდი. არ გამოვა "რეალი”? მაშინ, "მანჩესტერ იუნაიტედზეც” არ ვიტყოდი უარს”.
ჩისამბა ლუნგუ 1990 წლის 31 იანვარს ზამბიის ქალაქ კაფუეში დაიბადა.
კარიერა: "ზანაკო” (2007-2009), "ბაია” (2009-2010), "ურალი” (2010 წლიდან).