საფეხბურთო კლუბი ზუგდიდის "ბაია” ნიკა ძალამიძის ტრანსფერში 280 ათასი ევროს მიიღებს. ამის შესახებ პოლონური ინტერნეტგამოცემა gwizdek24.se.pl-ი იუწყება.
ძალამიძემ პოლონეთის ექსტრაკლასას პირველი წრე ლოძის "ვიძევში” ჩაამთავრა, სადაც "ბაიადან” იყო განათხოვრებული. ლოძელებს მისი სატრანსფერო უფლებების გამოსყიდვის უპირატესი უფლება ჰქონდათ, მაგრამ ზუგდიდელების მიერ დასახელებულ თანხას ვერ შეწვდნენ. სამაგიეროდ, 19 წლის ქართველი ბიალისტოკის "იაგელონიამ” შეიძინა, რომელთანაც შემტევმა ნახევარმცველმა ძალამიძემ 4-წლიანი კონტრაქტი გააფორმა.
შეგახსენებთ, რომ "იაგელონიაში” ძალამიძეს კიდევ ერთი ქართველი - მერაბ გიგაური დახვდება. სხვათა შორის, ბიალისტოკელთა მთავარი მწვრთნელი მსტისლავ მიხნევიჩია, რომელმაც თავის დროზე ძალამიძე "ვიძევში” აიყვანა.